వైయస్ సెజ్ ల పేరిట రైతుల నోట్లో మట్టి కొట్టారు: ఎమ్మెల్సీ రాజేంద్రప్రసాద్

హైదరాబాద్: తెలుగుదేశం పార్టీ అధ్యక్షుడు చంద్రబాబునాయుడు వ్యవసాయం దండుగ అన్నట్లు ఆధారాలు చూపిస్తే తాను రాజీనామాకు సిద్ధమని శాసనమండలి సభ్యుడు రాజేంద్రప్రసాద్ గురువారం సవాల్ విసిరారు. మాజీ పార్లమెంటు సభ్యుడు వైయస్ జగన్మోహన్ రెడ్డి కొందరు మంత్రులతో కలిసి చంద్రబాబునాయుడి దీక్షపై కుట్ర పన్నారన్నారు. ఎప్పుడు వక్రంగా ఆలోచించే వాళ్లకు ఇతరులది వక్రంగానే కనిపిస్తుందని జగన్ ఉద్దేశించి అన్నారు. రైతులకు అన్యాయం చేసింది చంద్రబాబు కాదని, దివంగత ముఖ్యమంత్రి వైయస్ రాజశేఖర్ రెడ్డి అన్నారు.

హైదరాబాద్ చుట్టుపక్కల ప్రాంతంలో రైతుల భూములను లాక్కున్న ఘనత దివంగత వైయస్ దేనన్నారు. సెజ్ ల పేరిట రైతుల నోట్లో మట్టి కొట్టారని ధ్వజమెత్తారు. నిన్నగాక మొన్న వచ్చిన జగన్ కు రైతుల సమస్యలు ఏం తెలుసునని ప్రశ్నించారు. రైతులకు ప్రకటించిన సాయం ఏ మూలకు సరిపోదని మరో మాజీ మంత్రి పెద్దిరెడ్డి ఎన్టీఆర్ ట్రస్ట్ భవన్లో అన్నారు. రైతులు ఆత్మహత్యలు చేసుకుంటుంటే రాష్ట్రంలో ఒక్క ముఖ్యమంత్రి కిరణ్ కు మాత్రమే కనిపించడం లేదన్నారు. చంద్రబాబుకు పేరు వస్తుందనే కిరణ్ మొండిగా వ్యవహరిస్తున్నట్టున్నారని అన్నారు. చంద్రబాబుపై వ్యంగాస్త్రాలు సరికాదని, భాష రాకుంటే భాష నేర్చుకోవాలని సూచించారు.