వైయస్ జగన్ పగటి కలలు కంటున్నాడు: దేవినేని ఉమామహేశ్వరరావు

విజయవాడ: రైతాంగ సమస్యలపై 48 గంటలపాటు నిరాహార దీక్ష చేపట్టిన మాజీ పార్లమెంటు సభ్యుడు వైయస్ జగన్మోహన్ రెడ్డికి రాష్ట్ర రైతాంగంనుండి మద్దతు లభించలేదని తెలుగుదేశం పార్టీ సీనియర్ నాయకుడు దేవినేని ఉమామహేశ్వరరావు శుక్రవారం విమర్శించారు. తన లక్ష్యదీక్షకు లక్ష జనం వస్తారని జగన్ అనుకుంటే అందులో సగం కూడా రాకపోవటం ఆయనను తీవ్ర నిరాశకు లోను చేసిందన్నారు. తన తండ్రి హయాంలో దోచుకున్న లక్షల కోట్ల రూపాయలతో లక్ష్యదీక్షను ఏర్పాటు చేసి తెలుగుదేశాన్ని లక్ష్యంగా చేసుకున్నారన్నారు.

వేదికపైన మాట్లాడన వారందరూ తెలుగుదేశం పార్టీని లక్ష్యంగా చేసుకొని మాట్లాడారని, అందులో ఒక్క రైతు కూడా లేరని ఆరోపించారు. లక్ష్యదీక్షలో ఒక్క రైతు కుటుంబంతోనైనా మాట్లాడించారా అని ప్రశ్నించారు. కిరణ్ కుమార్ ప్రభుత్వం పడిపోతుందని జగన్ పగటి కలలు కంటున్నారన్నారు. తెలుగుదేశం పార్టీ అధ్యక్షుడు చంద్రబాబునాయుడిని విమర్శించడానికే వేదికను ఉపయోగించుకున్నారన్నారు. చంద్రబాబుపై జగన్ వ్యాఖ్యలు నిజం కావన్నారు.