వైయస్సార్ పై ఈనాడు డైలీ ధ్వజం: జగన్ పై పరోక్ష వ్యాఖ్యలు

హైదరాబాద్‌: రైతు సమస్యలపై మాజీ పార్లమెంటు సభ్యుడు వైయస్ జగన్ చేసిన వ్యాఖ్యలను రామోజీ రావుకు చెందిన ఈనాడు దినపత్రిక చాలా తెలివిగా తిప్పికొట్టే ప్రయత్నం చేసింది. రైతు సంక్షేమ రాజ్యంలో ఆత్మహత్యలే అధికం అనే శీర్షిక కింద వైయస్ రాజశేఖర రెడ్డి ప్రభుత్వ హయాంలో జరిగిన రైతు ఆత్మహత్యలు, ప్రభుత్వం అందించిన సాయం గుట్టు విప్పింది. రైతు రాజ్యంగా, రాయితీల రాజ్యంగా చెప్పుకునే వైయస్ ప్రభుత్వ హయాంలోనే రైతన్నల ఆత్మహత్యలు పెరిగాయని వ్యాఖ్యానించింది. ఇప్పుడే కాదు, గత ఐదేళ్లలోనూ రాష్ట్రంలో రైతుల ఆత్మహత్యలు ఆగలేదని, పైగా అవి పెరుగుతూనే ఉన్నాయని అధికారిక లెక్కలే చెబుతున్నాయని వ్యాఖ్యానించింది. గత ఐదేళ్లలో సగటున రోజూ ఆరుగురు రైతులు ఆత్మహత్యలు చేసుకున్నారని నేషనల్ క్రైం రికార్డు బ్యూరో వెల్లడించినట్లు ఉటంకించింది.

తెలుగుదేశం ప్రభుత్వం ఉన్నప్పుడు రోజూ సగటున నాలుగు ఆత్మహత్యలు జరగగా, వైయస్ రాజశేఖర రెడ్డి ప్రభుత్వం ఏర్పడిన తర్వాత ఆరుకు పెరిగాయని తేల్చింది. 1999 - 2003 మధ్య 8,704 మంది ఆత్మహత్య చేసుకోగా, 2004 - 2008 మధ్య 11,665 మంది ఆత్మహత్య చేసుకున్నట్లు తెలిపింది. వైయస్ రాజశేఖర రెడ్డి అధికారంలో ఉండగా రైతులకు అందిన సహాయం అంతంత మాత్రమేనని చెప్పడానికి గణాంక వివరాలను ఈనాడు దినపత్రిక అందించింది. ఈ కాలంలో రైతులు ఏ విధంగా నష్టపోయిందనే వివరాలను కూడా వివరంగా అందించింది.