పెళ్లికి తల్లిదండ్లులు ఒప్పుకోకపోవటంతో ఇంజనీరింగ్ విద్యార్థి బలి

కరీంనగర్: ప్రేమ వ్యవహారం మరొకరిని బలి తీసుకున్నది. కరీంనగర్ జిల్లాలో శ్రీకాంత్ అనే ఇంజనీరింగ్ విద్యార్థి ప్రేమించి పెళ్లి చేసుకున్నప్పటికీ అమ్మాయి తల్లిదండ్రులు ఆమెను తీసుకు వెళ్లడంతో ఆత్మహత్య చేసుకొని చనిపోయినట్టు తెలుస్తోంది. కరీంనగర్ జిల్లాకు చెందిన శ్రీకాంత్ ఓ ఇంజనీరింగ్ కళాశాలలో చదువుతున్నాడు. అదే కళాశాలలో ఇంజనీరింగ్ చేస్తున్న జ్యోత్స్న అనే అమ్మాయిని ప్రేమించాడు. ఇరువైపుల తల్లిదండ్రులు వారి పెళ్లికి ఒప్పుకోలేదు. దీంతో వారిద్దరూ వేములవాడలో ఇటీవల పెళ్లి చేసుకున్నారు.

విషయం తెలుసుకున్న జ్యోత్స్న తల్లిదండ్రులు ఆ పెళ్లిని అసలూ ఒప్పుకోలేదు. దీంతో శ్రీకాంత్, జ్యోత్స్న దంపతులు మాజీ మంత్రి మాతంగి నర్సయ్య వద్ద మొరపెట్టుకున్నారు. ఆయన ఇరువైపుల తల్లిదండ్రులను పిలిచి కౌన్సెలింగ్ ఇచ్చారు. అయితే జ్యోత్స్న తల్లిదండ్రులపై మాత్రం ఆ కౌన్సెలింగ్ పని చేయలేదు. ఆ తర్వాత జ్యోత్స్నను వారు బలవంతంగా తీసుకు వెళ్లారు. దీంతో తీవ్ర మనస్థాపానికి లోనైన శ్రీకాంత్ ఆత్మహత్య చేసుకొని చనిపోయినట్టు తెలుస్తోంది. మృతుడి బంధువులు పెద్దపల్లి ఆసుపత్రి ఎదుట ఆందోళన చేస్తున్నారు. దొంగతనంగా వచ్చి శ్రీకాంత్ ను అమ్మాయి వాళ్లు కొట్టారని ఆరోపిస్తున్నారు.