ఎంపీల దీక్షకు దిగొచ్చిన అధిష్టానం: కేసులన్నీ ఎత్తివేయాలని ఆదేశం

న్యూఢిల్లీ: విద్యార్థులపై పెట్టిన కేసులు అన్నీ ఎత్తివేయాలని తెలంగాణ కాంగ్రెసు పార్లమెంటు సభ్యులు గత రెండు రోజులుగా చేస్తున్న దీక్షకు కాంగ్రెసు అధిష్టానం దిగి వచ్చింది. తమ పార్టీ పార్లమెంటు సభ్యులే దీక్షకు దిగడంతో ఖంగుతిన్న అధిష్టానం విద్యార్థుల కేసుల విషయంలో ఎంపీల దీక్షకు సానుకూలంగ స్పందించింది. రాష్ట్రంలో తెలంగాణ, సీమాంధ్ర విద్యార్థులపై ఉన్న కేసులను అన్నింటిని ఎత్తివేయాల్సిందిగా ముఖ్యమంత్రి కిరణ్ కుమార్ రెడ్డిని అధిష్టానం ఆదేశించినట్లు తెలుస్తోంది. అధిష్టానం ఆదేశంతో ముఖ్యమంత్రి కూడా కేసులు ఎత్తివేయడానికి సుముఖత వ్యక్తం చేసినట్టు తెలుస్తోంది. అయితే కేసుల ఎత్తివేతపై ఈ రోజు సాయంత్రం అధికారికంగా ప్రకటించే అవకాశం ఉంది.

సోమవారం కేసులు ఎత్తివేయాలని కాంగ్రెసు ఎంపీలు దీక్షకు దిగడంతో రాష్ట్ర ప్రభుత్వం స్పందించి మరో 135 కేసులు ఎత్తివేయడానికి సంసిద్దత వ్యక్తం చేసింది. అయితే ఎంపీలు మాత్రం అన్ని కేసులు ఎత్తివేయాల్సిందేనని డిమాండ్ చేశారు. శాసనసభ సమావేశాల సందర్భంగా విపక్షాలు విద్యార్థులపై కేసులు ఎత్తివేయాలని కోరితే ముఖ్యమంత్రి ప్రభుత్వం 565 కేసులు ఎత్తివేయడానికి సుముఖత వ్యక్తం చేసింది. అయితే విపక్షాలు ఎంతగా అన్ని కేసులు ఎత్తివేయాలని డిమాండ్ చేసినప్పటికీ ముఖ్యమంత్రి ఒప్పుకోలేదు. న్యాయపరమైన చిక్కులు వస్తాయని వాటన్నింటిని పరిశీలించిన అనంతరం ఒక్కోటి ఎత్తివేస్తామని చెప్పుకొచ్చారు.

అందుకు తెలంగాణ కాంగ్రెసు తో సహా అన్ని పార్టీలు ససేమీరా అన్నాయి. కోర్టులో న్యాయపరమైన చిక్కులు వస్తే తరువాత చూసుకోవచ్చునని డిఎస్ కూడా సూచించారు. అయినప్పటికీ సిఎం ససేమీరా అన్నారు. ఇప్పుడు అధిష్టానం అదేశంతో ఇరుప్రాంతాలలోని సుమారు 1600 కేసులు సాయంత్రం ఎత్తివేసే అవకాశాలు ఉన్నాయి. కేసులు ఎత్తివేయడంతో పాటు న్యాయపరమైన చిక్కులు మళ్లీ మళ్లీ రాకుండా కేసులు ఎత్తివేయాలని అధిష్టానం అదేశించినట్టు తెలుస్తోంది.