తెలంగాణ రాష్ట్రం సాధించి తీరుతాం: కాంగ్రెసు ఎంపి కేశవరావు

హైదరాబాద్: ప్రభుత్వం విద్యార్థులపై కేసులు ఎత్తివేయడం ఆనందించదగ్గ విషయమని కాంగ్రెసు సీనియర్ నాయకుడు కేశవరావు దీక్ష విరమణ అనంతరం అన్నారు. మేం కోరింది పెద్ద కోరిక కాదన్నారు. విద్యార్థులపై కేసులు ఎత్తివేయాలని కోరింది మేము, తెలంగాణ కోసం ప్రజల్లో మాట్లాడింది మేము, మేమే అధికారంలో ఉండగా తెలంగాణకు, తెలంగాణ విద్యార్థులకు న్యాయం జరగకపోవటం తీవ్రంగా కలిచి వేసిందన్నారు. ఆ కారణంగానే మేం దీక్షకు పూనుకున్నామన్నారు. అందరమూ సమైక్యంగా ఉండి ఈ విజయాన్ని సాధించామన్నారు. విద్యార్థులు క్రిమినల్సు కారన్నారు. వారు ఆవేశంలోనే తప్పులు చేశారన్నారు.

తెలంగాణ పట్ల ఆవేశంగా ఉద్యమం చేసిన విద్యార్థుల పట్ల ప్రభుత్వం సానుభూతితో ఉందన్నారు. విద్యార్థులపై పెట్టిన కేసులు ఎత్తివేయడంతో కాంగ్రెసు పట్ల, ఏఐసిసి అధ్యక్షురాలు సోనియాగాంధీ పట్ల నమ్మకం పెరిగిందన్నారు. తెలంగాణ రాష్ట్ర సమితి సైతం అందరమూ కలిసి పని చేస్తామని హామీ ఇచ్చిందన్నారు. తెలంగాణకోసం వారితో కలిసి పనిచేసి తెలంగాణను సాధించుకుందామని చెప్పారు. విద్యార్థులపై కేసులు ఎత్తివేయడానికి ప్రభుత్వం స్పష్టమైన హామీ ఇచ్చినందువల్ల దీక్షను విరమించాలని నిర్ణయించుకున్నట్లు చెప్పారు. దీక్షకు మద్దతు పలికిన వారందరికీ ఆయన కృతజ్ఞతలు తెలిపారు. అందరం కలిసి కట్టుగా ఉద్యమిస్తే తెలంగాణ కూడా సాధ్యమవుతుందన్నారు.