శ్రీకృష్ణ కమిటీ నివేదిక వివరాల వెల్లడికి మంత్రుల బృందం

న్యూఢిల్లీ: శ్రీకృష్ణ కమిటీ నివేదిక వివరాలను వెల్లడించడానికి ప్రధాని మన్మోహన్ సింగ్ మంత్రుల బృందాన్ని ఏర్పాటు చేసే అవకాశం ఉంది. కాగా, నివేదిక వెల్లడికి నోడల్ అధికారిని నియమిస్తామని సమాచార, ప్రసారాల శాఖ మంత్రి అంబికా సోనీ మీడియా ప్రతినిధులతో చెప్పారు. తెలంగాణ అంశంపై ఉన్నత స్థాయి సమావేశంలో సీనియర్ కేంద్ర మంత్రులు ప్రణబ్ ముఖర్జీ, చిదంబరంలతో ప్రధాన మంత్రి చర్చించారు. జస్టిస్ శ్రీకృష్ణ కమిటీ నివేదికని పరిశీలించి, మీడియాకు వెళ్లడించడానికి ప్రధాన మంత్రి మన్మోహన్ సింగ్ మంత్రుల బృందాన్ని ఏర్పాటు చేయాలన్న యోచనలో ఉన్నారు.

ఏకపక్షంగా నివేదిక వివరాలు వెల్లడిస్తే ప్రభుత్వానికి చిక్కులు తప్పవని కేంద్ర మంత్రులు మమతా బెనర్జీ, శరద్ పవార్, తమిళనాడు ముఖ్యమంత్రి కరుణానిధి హెచ్చరికల నేపధ్యంలో మంత్రుల బృందాన్ని ఏర్పాటు చేయాలని, ఈ బృందంలో భాగస్వామ్య పక్షాలకు చెందిన సీనియర్ మంత్రులకు స్థానం కల్పించాలని ప్రధాని నిర్ణయించారుఈ నెల 31 న చిదంబరం అరుణాచాలప్రదేశ్ పర్యటన తర్వాత మంత్రుల బృందంతో చర్చించిన అనంతరం జనవరి 4,5 తేదీలలో కేంద్ర మంత్రి చిదంబరం నివేదిక వివరాలను మీడియాకు వెళ్లడించే అవకాశం ఉంది.