మున్నాబాయ్ కి అండర్ వరల్డ్ బెదిరింపులు: న్యాయవాది వెల్లడి

ముంబై: సంజయ్ దత్, షకీల్ నూరాని వివాదం సంచలనాత్మకమైన మలుపు తిరిగింది. డబ్బులు ఇవ్వాలని 2005లో అండర్ వరల్డ్ నుంచి సంజయ్ దత్ కు బెదిరింపులు వచ్చాయని ఆయన న్యాయవాది రిజ్వాన్ మర్చెంట్ చెప్పారు. నిర్మాత షకీల్ నూరాని ప్రోద్బలంతోనే అండర్ వరల్డ్ సంజయ్ దత్ ను బెదిరించినట్లు ఆయన ఆరోపించారు. జాన్ కీ బాజీ సినిమాను వదిలేసినందుకు షకీల్ నూరాని సంజయ్ దత్ పై కేసు వేశారు.

ఒప్పందం కోసం ఇచ్చిన 50 లక్షల రూపాయలతో పాటు సంజయ్ దత్ 2.03 కోట్ల రూపాయలు తనకు ఇవ్వాల్సి ఉందని నూరాని వాదిస్తున్నారు. దత్ ఆస్తుల అటాచ్ మెంట్ కు బొంబాయి హైకోర్టు ఆదేశాలు జారీ చేసిన నేపథ్యంలో రిజ్వాన్ మర్చెంట్ ఆ ఆరోపణలు చేశారు. నూరానికి సంజయ్ దత్ సొమ్మును 30 రోజుల్లోగా చెల్చించాల్సి ఉంటుంది. లేకపోతే సంజయ్ ఆస్తులను వేలం వేస్తారు. హైకోర్టు ఆదేశాలను సంజయ్ దత్ సవాల్ చేసే అవకాశం కూడా ఉంది.