తెలంగాణపై కాలక్షేపం కోసమే అఖిలపక్షం: వెంకయ్యనాయుడు

నెల్లూరు: తెలంగాణ అంశంపై కేంద్రం ఏర్పాటు చేసిన శ్రీకృష్ణ కమిటీ నిర్ణీత సమయంలో తన నివేదికను సమర్పించినప్పటికీ కేంద్ర ప్రభుత్వం ఆ అంశాన్ని ఆలస్యం చేయాలని చూస్తుందని భారతీయ జనతా పార్టీ జాతీయ నాయకుడు ముప్పారపు వెంకయ్యనాయుడు శుక్రవారం శ్రీ పొట్టి శ్రీరాములు నెల్లూరు జిల్లాలో ఆరోపించారు. హోంమంత్రి చిదంబరం రానున్న జనవరి 6వ తారీఖున మరోసారి అఖిలపక్షాన్ని రమ్మనటం కాలక్షేపం కోసమేనన్నారు.

గతంలోనే కేంద్రం అఖిలపక్షం నిర్ణయాలను తీసుకుందని, మరోసారి వారని పిలవాల్సిన అవసరం ఏమిటని ప్రశ్నించారు. శ్రీకృష్ణ కమిటీ నివేదిక కేంద్రం బహిర్గతం చేసిన తర్వాతే ఆ నివేదికపై భాజపా స్పందిస్తుందన్నారు. అయితే చిన్న రాష్ట్రాలకు భాజపా కట్టుబడి ఉందని చెప్పారు. రైతుల రుణాలను మూడేల్లు వాయిదా వేస్తే వడ్డీలు మాఫీ చేయాలని ఆయన ప్రభుత్వాన్ని డిమాండ్ చేశారు.