శ్రీకృష్ణ నివేదికపై తెలంగాణలో పెల్లుబుకుతున్న నిరసన

హైదరాబాద్: కేంద్రం ఏర్పాటు చేసిన శ్రీకృష్ణ కమిటీ నివేదిక అస్పష్టంగా ఉందని గురువారం నివేదిక బహిర్గతం అయిన అనంతరం విద్యావేత్త, శాసనమండలి సభ్యుడు చుక్కా రామయ్య అన్నారు. తెలంగాణ ప్రజలు కమిటీలపై నమ్మకం కోల్పోయారని ఆయన అన్నారు. శ్రీకృష్ణ కమిటీ నివేదిక సమస్యను మరింత జఠిలం చేసిందన్నారు. అది అర్థం లేని నివేదిక అన్నారు. పేరు పట్టమంటే ఐదు పేర్లు పెట్టినట్లుగా ఉందన్నారు. తెలంగాణను పోరాడి సాధించుకోవడమే ఇక మిగిలిందన్నారు.

శ్రీకృష్ణ కమిటీ నివేదిక తాంబూలాలు ఇచ్చాం తన్నుకు చావండి అన్న తరహాలో ఉందని భారతీయ జనతా పార్టీ సీనియర్ నాయకుడు ఎం.వెంకయ్యనాయుడు అన్నారు. కమిటీ నివేదిక సరిగా లేదన్నారు. వారు కొత్తగా సూచించిందేమిటని ఆయన ప్రశ్నించారు. తమకు కమిటీ నివేదికతో సంబంధం లేదని ఉస్మానియా విశ్వవిద్యాలయం ఐక్య కార్యాచరణ సమితి ప్రకటించింది. కేంద్రం తెలంగాణను ప్రకటించకుంటే విద్యార్థుల సత్తా చూపుతామన్నారు. కమిటీ నివేదికను బహిష్కరిస్తున్నట్టు చెప్పారు.