ఖాకీల దెబ్బలకు వరంగల్‌లో నెత్తురోడిన కలెక్టరేట్ ముట్టడి

వరంగల్: పార్లమెంటులో తెలంగాణ బిల్లు ప్రవేశపెట్టాలంటూ తెలంగాణ ఐక్య కార్యాచరణ సమితి చేపట్టిన కలెక్టరేట్ ముట్టడి వరంగల్‌లో తీవ్ర ఉద్రిక్తతకు దారి తీసింది. వరంగల్‌లో తెలంగాణవాదులు కలెక్టరేట్‌ను ముట్టడించడానికి యత్నించారు. దీనిని పోలీసులు అడ్డుకున్నారు. దీంతో పోలీసులు, తెలంగాణవాదులకు మధ్య తీవ్ర తోపులాట జరిగింది. దీంతో పలువురు ఆందోళనకారులు కంచెపై పడ్డారు. పోలీసులు లాఠీచార్జ్ చేశారు. సుమారు 20 మందికి తీవ్ర గాయాలయ్యాయి. ఒక పోలీసుకు కూడా గాయాలయ్యాయి.

అనీల్‌కుమార్ అనే విద్యార్థికి తీవ్ర గాయాలయ్యాయి. ఆయనను స్థానిక ఆసుపత్రికి తరలించారు. మీడియా ప్రతినిధులపైన కూడా పోలీసులు విరుచుకు పడ్డారు. ముగ్గురు మీడియా ప్రతినిధులకు తీవ్ర గాయాలయ్యాయి. రాజ్ న్యూస్ జర్నలిస్టులకు, జీ తెలుగు కెమెరామెన్‌కు గాయాలయినట్లుగా తెలుస్తోంది. ధర్నాలో మాజీ శాసనసభ్యుడు ధర్మారావు పాల్గొన్నారు.