సిని నిర్మాత సి కళ్యాణ్‌ ను విచారించిన సిసిఎస్ పోలీసులు

హైదరాబాద్: మద్దెలచెర్వు సూరి హత్య కేసులో సినీ కోణం ఉందన్న అనుమానాల నేపథ్యంలో హైదరాబాద్ నేరపరిశోధక విభాగం(సిసిఎస్) పోలీసులు గురువారం సినీ నిర్మాత సి కళ్యాణ్‌ను ప్రశ్నించారు. సుమారు గంటపాటు సిసిఎస్ పోలీసులు కళ్యాణ్‌ ను ప్రశ్నించారు. తనకు భానుతో రక్త చరిత్ర చిత్రంతోనే పరిచయమని అంతకుమించి ఎలాంటి పరిచయాలు లేవని చెప్పినట్టు తెలుస్తోంది. ఆ చిత్రానికి భాను కో ప్రొడ్యుసర్ అని పోలీసులకు ఆయన చెప్పినట్టుగా తెలుస్తోంది. మీడియా తనను అనవసరంగా వివాదంలోకి లాగుతోందని సి కళ్యాణ్ మీడియాపై విరుచుకు పడ్డారు.

నిర్మాతలు సి కళ్యాణ్‌ తో, శింగనమల రమేష్ ‌తో భానుకు గల లింకులను వారు ప్రశ్నించినట్టుగా తెలుస్తోంది. వారు సుమారు చిత్ర పరిశ్రమలో వందల కోట్ల రూపాయల పెట్టుబడులు పెట్టినట్లుగా పోలీసులు భావిస్తున్నారు. మహేష్‌ బాబు ఖలేజా, వర్మ రక్త చరిత్ర, పవన్ కళ్యాణ్ పులి, బాలకృష్ణ పరమవీర చక్ర చిత్రాలలో వారు పెట్టుబడులు పెట్టినట్టుగా తెలుస్తోంది. సిసిఎస్ పోలీసులు భూకబ్జాలు, సెటిల్మెంట్ల విషయంపై కూడా కళ్యాణ్‌ను ప్రశ్నించినట్టు తెలుస్తోంది.