అధిష్టానం బుజ్జగింపులకు లొంగం: ఎంపీ పొన్నం ప్రభాకర్

హైదరాబాద్: తాము అధిష్టానం బుజ్జగింపులకు లొంగి ప్రత్యేక తెలంగాణ ఉద్యమంనుండి తప్పుకునేది లేదని పార్లమెంటు సభ్యుడు పొన్నం ప్రభాకర్ సోమవారం తెలంగాణ కాంగ్రెసు ఎంపీల సమావేశం అనంతరం విలేకరులతో అన్నారు. తమను పార్టీ అధిష్టానం బుజ్జగించడానికి, కౌన్సిలింగులు ఇవ్వడానికి ప్రయత్నాలు చేయడం లేదని చెప్పారు. తెలంగాణ కాంగ్రెసు ఎంపీలను పార్టీ అధిష్టానం బుజ్జగిస్తోందని, కౌన్సిలింగులు ఇస్తుందంటూ వార్తలు వస్తున్నాయని అవి వాస్తవాలు కాదన్నారు. ఒకవేళ పార్టీ బుజ్జగించినా తాము తెలంగాణకు కట్టుబడి ఉన్నామని చెప్పారు.

పార్టీని ఒప్పించి తెలంగాణను సాధించుకుంటామన్నారు. తెలంగాణలో కాంగ్రెసు పార్టీని బలోపేతం చేస్తామన్నారు. త్వరలో జరగబోయే మంత్రివర్గ విస్తరణపై కూడా రాజకీయాలు అల్లుతున్నారన్నారు. మంత్రివర్గ విస్తరణ, తెలంగాణ ఉద్యమానికి సంబంధం లేదన్నారు. తెలంగాణకు చెందిన కొందరు ఎంపీలకు మంత్రి పదవులు వస్తే వారు ఉద్యమంలో భాగంగా అవసరమైన సమయంలో పదవులు త్యజిస్తారని చెప్పారు. తాము డిసెంబర్ 9న చిదంబరం ప్రకటించిన తెలంగాణకు కట్టుబడి ఉన్నామన్నారు. తెలంగణ తప్ప మాకు ఏదీ అవసరం లేదని చెప్పారు. మా ప్రాంత ప్రజల అభిష్టం ప్రకారమే మేం నడుచుకుంటామని స్పష్టం చేశారు.