అనీతిపరులు సమర్థులుగా గుర్తింపు పొందుతున్నారు: చంద్రబాబు

హైదరాబాద్: రాజకీయాల్లో అవినీతిపరులు సమర్థులుగా గుర్తింపు పొందుతున్నారని, నీతినిజాయితీ ఉన్నవారిని చేతకానివారిగా పరిగణిస్తున్నారని తెలుగుదేశం పార్టీ అధ్యక్షుడు నారా చంద్రబాబు నాయుడు ఆవేదన వ్యక్తం చేశారు. ఎన్టీఆర్ వర్దంతి సభలో ఆయన మంగళవారం ప్రసంగించారు. రాజకీయాలు భ్రష్టుపట్టిపోయాయని ఆయన అన్నారు. ఎంత మంది వచ్చినా, ఎంత మంది పోయినా ఎన్టీఆర్‌కు సాటి వచ్చే వ్యక్తి లేడని ఆయన అన్నారు. ప్రపంచవ్యాప్తంగా తెలుగువారి ఆత్మగౌరవాన్ని కాపాడిన న్యక్తి ఎన్టీఆర్ అని ఆయన ప్రశంసించారు. తెలుగువారి సత్తా చాటాల్సిన సమయం వచ్చిందని ఆయన అన్నారు. చరిత్రలో చిరస్థాయిగా ఉండే వ్యక్తులు ఎన్టీఆర్ లాంటివారేనని ఆయన అన్నారు. చేతకాని కాంగ్రెసు వల్ల ప్రజలు నష్టపోయే దుస్థితి వచ్చిందని ఆయన అన్నారు.

సంపదను దోచుకుంటున్నారని, విదేశాల్లో దాచుకుంటున్నారని, ప్రజల గురించి పట్టించుకోవడం లేదని ఆయన కాంగ్రెసు నాయకులను ఉద్దేశించి అన్నారు. చదువుకున్నవారిని రాజకీయాల్లోకి తెచ్చిన ఘనత ఎన్టీ రామారావుదని ఆయన అన్నారు. ఎన్ని ఒడిదొడుకులు, సవాళ్లు ఎదురైనా ఎన్టీఆర్ పార్టీని స్థాపించిన ముహూర్తబలం తెలుగుదేశం నిలబడుతోందని తెలుగుదేశం పార్టీ నాయకుడు కడియం శ్రీహరి అన్నారు. తమకు ముఖ్యమంత్రి కిరణ్ కుమార్ రెడ్డి ప్రభుత్వాన్ని పడగొట్టే సత్తా ఉందని, కానీ తమకు ఆ ఉద్దేశం లేదని పార్టీ నాయకురాలు నన్నపనేని రాజకుమారి అన్నారు. పార్టీ కోసం పనిచేసినవారికి ఎన్టీఆర్ గుర్తింపు ఇచ్చేవారని, ఈ విషయంలో పార్టీ పునరాలోచన చేయాలని తెలుగుదేశం నాయకుడు అరవింద్ కుమార్ గౌడ్ అన్నారు.