ఎన్టీఆర్ తర్వాత జగనే కాంగ్రెసును ఎదుర్కుంటున్నారు: లక్ష్మీపార్వతి

హైదరాబాద్: జాతీయ పార్టీ అయన కాంగ్రెస్ పార్టీని దివంగత ఎన్టీ రామారావు తర్వాత ఎదురొడ్డి నిలిచిన వ్యక్తి మాజీ పార్లమెంటు సభ్యుడు వైయస్ జగన్మోహన్‌రెడ్డే అని ఎన్టీఆర్ తెలుగుదేశం పార్టీ అధ్యక్షురాలు లక్ష్మీపార్వతి మంగళవారం అన్నారు. కాంగ్రెస్ పార్టీకి ఎదురు లేని ఎనభయ్యో దశకంలో రాష్ట్రంలో కాంగ్రెస్ పార్టీని మట్టికరిపించిన వ్యక్తి ఎన్టీఆర్ అని ఆమె చెప్పారు. కాంగ్రెస్‌ను రాష్ట్రంలో అడ్రసు లేకుండా చేశారని అన్నారు. ఆ తర్వాత ఇన్నాళ్లకు వైయస్ జగన్ కాంగ్రెస్‌కు ఎదురొడ్డి నిలుస్తున్నారన్నారు. ఎన్టీఆర్ తర్వాత జగనే కాంగ్రెస్‌ను ఎదిరించిన వ్యక్తులన్నారు.

రాష్ట్రంలో తెలుగుదేశం పార్టీకి మంచి వనరులు ఉన్నాయన్నారు. అయితే తెలుగుదేశం పార్టీ దానిని ఉపయోగించుకోలేక పోతోందన్నారు. ఎన్టీఆర్ తెలుగుదేశానికి మంచి కార్యకర్తలను సంపాదించి పెట్టారన్నారు. అయితే ఇప్పుడున్న వారు తెలుగుదేశానికి ఉన్న వనరులను ఉపయోగించుకోలేక పోతున్నారని అన్నారు. పార్టీలో నాయకత్వ లేమి ఉందన్నారు. సరియైన నాయకుడు లేకపోవడంతో తెలుగుదేశం పార్టీ నిర్వీర్యమవుతుందన్నారు. సరియైన నాయకుడు ఉండే తెలుగుదేశం పార్టీకి తిరుగు ఉండదన్నారు.

కాగా మంగళవారం ఎన్టీఆర్ వర్ధంతి సందర్భంగా లక్ష్మీపార్వతి ఎన్టీఆర్ ఘాట్‌కు వెళ్లి ఎన్టీఆర్ సమాధి వద్ద నివాళులు అర్పించారు. అయితే తెలుగు తమ్ముళ్లు ఆమెపై తీవ్రంగా ఆగ్రహం వ్యక్తం చేశారు. లక్ష్మీపార్వతికి వ్యతిరేకంగా నినాదాలు చేశారు. తెలుగుదేశాన్ని, ఎన్టీఆర్ పేరును లక్ష్మీపార్వతి మంట గలుపుతుందని ఆగ్రహం వ్యక్తం చేశారు.