వైయస్ జగన్ మరో బలప్రదర్శన: పెట్రో ధరపై 22న విశాఖలో ధర్నా

విశాఖపట్నం: మాజీ పార్లమెంటు సభ్యుడు వైయస్ జగన్ మరోసారి బలప్రదర్సనకు సిద్ధపడుతున్నారు. పెట్రోల్ ధర పెంపుపై ఆయన కేంద్ర ప్రభుత్వంపై తీవ్రంగా మండిపడ్డారు. విశాఖపట్నం జిల్లా పాయకరావుపేటలో ఆయన మంగళవారం ఓదార్పు యాత్ర నిర్వహించారు. ఈ సందర్భంగా ఆయన ప్రసంగించారు. పెట్రోల్ ధర పెంపునకు నిరసనగా ఈ నెల 22వ తేదీన విశాఖపట్నంలో ధర్నా చేస్తానని ఆయన ప్రకటించారు. ఈ నెల 21వ తేదీన విశాఖపట్న జిల్లాలో ఓదార్పు యాత్ర ముగుస్తుందని, 22వ తేదీన తాను ధర్నా చేస్తానని ఆయన చెప్పారు. ధర్నాకు అన్ని వర్గాలవారూ కలిసి రావాలని ఆయన కోరారు.

ఇప్పటికే నిత్యావసర ధరలు పెరిగి ప్రజలు తీవ్ర ఇబ్బందులకు గురవుతున్నారని, పెట్రోల్ ధర పెంచడం వల్ల ధరలు మరింత పెరుగుతాయని ఆయన చెప్పారు. పెట్రోల్ ధర పెంచడాన్ని ఆయన తీవ్రంగా వ్యతిరేకించారు. వైయస్ రాజశేఖర రెడ్డి చలువ వల్లనే రాష్ట్రంలో సంక్షేమ పథకాలు అమలులోకి వచ్చాయని ఆయన చెప్పారు. వైయస్సార్ ప్రవేశపెట్టిన పథకాలను ఆయన తన ప్రసంగంలో గుర్తు చేశారు.