డిఎల్ రవీంద్రారెడ్డిపై విరుచుకుపడ్డ జగన్ వర్గం నేత అంబటి

విజయవాడ: ఆరోగ్యశాఖమంత్రి డిఎల్ రవీంద్రారెడ్డిపై మాజీ పార్లమెంటు సభ్యుడు వైయస్ జగన్మోహన్‌రెడ్డి వర్గం నేత అంబటి రాంబాబు మరోసారి విరుచుకు పడ్డారు. ప్రభుత్వాన్ని కూల్చే ఉద్దేశ్యం తమకు లేదని పదేపదే చెబుతున్నప్పటికీ కాంగ్రెసు నేతలు పదేపదే సవాళ్లు చేయడం అనుమానాలకు తావిస్తోందని అంబటి బుధవారం విజయవాడలో అన్నారు. కొందరు కాంగ్రెసు వారు దమ్ముంటే ప్రభుత్వాన్ని పడగొట్టాలని జగన్ వర్గంపై సవాళ్లు విసిరుతున్నారని, మేం ప్రభుత్వాన్ని పడగొట్టమని చెప్పినప్పటికీ అలా సవాళ్లు విసురుతుండటంపై అనుమానాలు ఉన్నాయన్నారు.

విజయవాడలో జరిగిన లక్ష్యదీక్ష, న్యూఢిల్లీలో జరిగిన జలదీక్షలో పాల్గొన్న శాసనసభ్యులే కాకుండా మరికొంత మంది జగన్ వెంట ఉన్నారన్నారు. వారే కాకుండా చాలామంది జగన్ వెంట నడవడానికి సిద్ధంగా ఉన్నారని తెలిపారు. నేతలను గెలిపించిన ప్రజలకు వారిని రీకాల్ చేసే అవకాశమే ఉండి ఉంటే ఈ ప్రభుత్వం ఎప్పుడో కుప్పకూలేదని అన్నారు. జగన్ వర్గం ఎమ్మెల్యేలకు మంత్రులు డిఎల్ రవీంద్రారెడ్డి, శంకర్‌రావు పదేపదే సవాల్ విసురుతున్న విషయం తెలిసిందే.