అన్నదమ్ముల్లా విడిపోదామని కావూరిని బతిలాడిన తెలంగాణ ఎంపీలు

న్యూఢిల్లీ: అన్నదమ్ముల్లా విడిపోదామని, తెలంగాణ రాష్ట్ర ఏర్పాటును వ్యతిరేకించవద్దని కాంగ్రెసు తెలంగాణ పార్లమెంటు సభ్యులు తమ పార్టీ సీమాంధ్ర పార్లమెంటు సభ్యుడు కావూరి సాంబశివ రావును బతిమిలాడారు. కాంగ్రెసు తెలంగాణ ప్రాంత పార్లమెంటు సభ్యులు పొన్నం ప్రభాకర్, మందా జగన్నాథం, బలరామ్ నాయక్, రాజయ్య బుధవారం కావూరి సాంబశివ రావును కలిసి ఆ విజ్ఞప్తి చేశారు. కేంద్ర మంత్రి ప్రణబ్ ముఖర్జీతో గురువారం జరిగే పార్టీ సీమాంధ్ర పార్లమెంటు సభ్యుల సమావేశంలో తెలంగాణ రాష్ట్ర ఏర్పాటును వ్యతిరేకించవద్దని వారు కావూరిని కోరారు. అయితే, సీమాంధ్ర పార్లమెంటు సభ్యులతో చర్చించి నిర్ణయం తెలియజేస్తామని కావూరి వారికి హామీ ఇచ్చారు.

మన్మోహన్ సింగ్ మంత్రివర్గంలో రాష్ట్రం నుంచి కొత్తగా ఎవరికీ స్థానం దక్కదని తేలిపోయిన నేపథ్యంలో కాంగ్రెసు పార్లమెంటు సభ్యులు కావూరి సాంబశివ రావు నివాసంలో సమావేశమయ్యారు. పరిస్థితిపై సమీక్షించారు. తమకు మంత్రి పదవులు ముఖ్యం కాదని, రాష్ట్రానికి తగిన సహాయాన్ని కేంద్రం నుంచి రాబట్టడమే ముఖ్యమని, మంత్రి పదవులు రాకపోయినా అందుకు కృషి చేద్దామని పార్లమెంటు సభ్యులు ఓ నిర్ణయానికి వచ్చినట్లు సమాచారం.