కాంగ్రెసు బోటు మునిగిపోవడానికి సిద్దంగా ఉందన్న ఎంపీ రాయపాటి

న్యూఢిల్లీ: కాంగ్రెసు బోటు మునిగిపోతోందని, మునిగిపోకుండా చూసుకోవాల్సిన బాధ్యత అధిష్టానంపై ఉందని గుంటూరు ఎంపీ రాయపాటి సాంబశివరావు సంచలన వ్యాఖ్యలు చేశారు. కేంద్ర కేబినెట్‌లో రాష్ట్రానికి అన్యాయం జరిగిన విషయమై ఆయన గురువారం ఢిల్లీలో మీడియాతో మాట్లాడారు. అన్యాయాన్ని అధిష్టానానికి చెపుతారా అని ప్రశ్నించగా.. 'మేమెందుకు చెప్పాలి? మాకేం పని? ఎవరేమిటి...ఎవరు పార్టీకి విధేయులుగా ఉంటున్నారు..పార్టీకి ఉపయోపడేది ఎవరనే విషయాలు అధిష్టానం ఆలోచించుకోవాలి" అని హితవు చెప్పారు.

2000ల నుంచి రాయలసీమ, ఆంధ్రా నుంచి ఒక్కరికి కూడా కేబినెట్‌ లో స్థానం కల్పించలేదని ఆవేదన వ్యక్తం చేశారు. కోస్తాంధ్రలో 22 మంది ఎంపీలు ఉండగా ఎవ్వరినీ పరిగణనలోకి లేరా..? మేం సీనియర్స్ కాదా..? అని ప్రశ్నించారు. ఎంపీలకు సరైన గుర్తింపు లేదని, అధిష్టానానికి చెప్పినా ఎలాంటి ఉపయోగం లేదని విమర్శించారు. మొత్తం రాష్ట్రానికి కలిపి ఒక్క కేబినెట్‌తో సరిపెట్టడంలో అర్థం ఏమిటని ప్రశ్నించారు. ఇవి 2014 ఎన్నికల్లో కాంగ్రెసు‌కు ఇబ్బంది కలిగే పరిణామాలని ఆయన వ్యాఖ్యానించారు.