షబ్బీర్ అలీ సమావేశంలో ఉద్రిక్తత: రాళ్లు రువ్వుకున్న కాంగ్రెస్, టిఆర్ఎస్

నిజామాబాద్: జిల్లాలోని బిక్కనూరు మండలం బస్వాపూర్‌లో మాజీ మంత్రి షబ్బీర్ అలీ పర్యటన ఆదివారం తీవ్ర ఉద్రిక్తంగా మారింది. కాంగ్రెస్, తెలంగాణ రాష్ట్ర సమితి కార్యకర్తల మధ్య తోపులాటలు, రాళ్ల వర్షం కురిసింది. షబ్బీర్‌ అలీ ఆధ్వర్యంలో బస్వాపూర్‌లో కార్యకర్తల సమావేశం నిర్వహించారు. ఈ సమావేశం విషయం తెలుసుకున్న టిఆర్ఎస్ కార్యకర్తలు అక్కడకు చేరుకొని రచ్చబండను రద్దు చేయాలని డిమాండ్ చేస్తూ నినాదాలు చేశారు.

తెలంగాణ ప్రకటించే వరకు రచ్చబండను రద్దు చేయాలన్నారు. తెలంగాణ కోసం కాంగ్రెస్ ప్రజా ప్రతినిధులు రాజీనామా చేయాలని డిమాండ్ చేశారు. ఈ నేపథ్యంలో కాంగ్రెస్, టీఆర్ఎస్ వర్గాల మధ్య తీవ్ర తోపులాట జరిగింది. చివరకు రాళ్ల వర్షానికి దారి తీసింది. దీంతో అక్కడి పరిస్థితి ఉద్రిక్తంగా మారింది. పోలీసులు రంగప్రవేశం చేసి పరిస్థితిని చక్కదిద్దారు.