చంద్రబాబు దెబ్బకు దిగొచ్చిన తెలంగాణ నేత నాగం జనార్దన్ రెడ్డి

హైదరాబాద్: తమ పార్టీ అధ్యక్షుడు నారా చంద్రబాబునాయుడి దెబ్బకు తెలుగుదేశం పార్టీ తెలంగాణ ఫోరం కన్వీనర్ నాగం జనార్దన్ రెడ్డి దిగొచ్చారు. తెలంగాణ కోసం ప్రత్యేక కమిటీ గానీ సమన్వయ కమిటీ గానీ అవసరం లేదని ఆయన అంగీకరించారు. ఫోరం తరఫుననే తెలంగాణ కోసం పోరాడుతామని చెప్పారు. పార్టీ అధ్యక్షుడు నారా చంద్రబాబునాయుడితో సోమవారం సమావేశమైన తెలంగాణ నేతలు ఆ మేరకు నిర్ణయం తీసుకున్నట్లు నాగం జనార్దన్ రెడ్డి ప్రకటించారు. మరోసారి సమావేశమైన తెలంగాణ ఉద్యమ కార్యాచరణను ప్రకటిస్తామని ఆయన చెప్పారు.

పార్లమెంటు బడ్జెట్ సమావేశాల సందర్భంగా ఢిల్లీలో తాము చేయాల్సిన పోరాటంపై నిర్ణయం తీసుకుంటామని ఆయన చెప్పారు. తెలంగాణ బిల్లుకోసం ఢిల్లీపై ఒత్తిడి తేనున్నట్లు ఆయన తెలిపారు. తెలంగాణ ప్రజల మనోభావాలకు అనుగుణంగా ఆందోళనలు ఉంటాయని ఆయన చెప్పారు. తెలంగాణ కోసం మండలస్థాయి నుంచి కార్యకర్తలు పోరాటాలు చేస్తారని ఆయన చెప్పారు. కాగా, తీవ్రంగా విభేదించిన మోత్కుపల్లి నరసింహులుతో నాగం జనార్దన్ రెడ్డికి సయోధ్య కుదిరింది. నాగం జనార్దన్ రెడ్డి తీరుపై ఇటీవల మోత్కుపల్లి నర్సింహులు తీవ్రంగా మండిపడిన విషయం తెలిసిందే.