పరిటాల హత్యకు వైయస్ యత్నిస్తున్నారని ఫిర్యాదు చేశాం: చంద్రబాబు

హైదరాబాద్: దివంగత పరిటాల రవిని నాటి ముఖ్యమంత్రి వైయస్ రాజశేఖరరెడ్డి చంపడానికి ప్రయత్నాలు చేస్తున్నారని అప్పట్లో రాష్ట్రపతిని, ప్రధానమంత్రిని కలిశామని తెలుగుదేశం పార్టీ అధ్యక్షుడు, మాజీ ముఖ్యమంత్రి చంద్రబాబునాయుడు సోమవారం అన్నారు. ఆయన హైదరాబాదులోని ఎన్టీఆర్ ట్రస్టు భవన్‌లో పరిటాల రవి 6వ వర్ధంతి సందర్భంగా ఆయన చిత్ర పటానికి పూలమాల వేసి నివాళులు అర్పించారు. అనంతరం ఆయన మాట్లాడారు. పరిటాల రవీంద్ర ప్రజల హృదయాల్లో ఎప్పటికీ నిలిచి ఉంటారని అన్నారు.

పరిటాల రవీంద్ర నిందితులు ఒక్కొక్కరు చనిపోతుంటే ప్రభుత్వం ఏం చేస్తుందని ప్రశ్నించారు. మద్దెలచెర్వు సూరి హత్య జరిగి ఇరవై రోజులు గడుస్తున్నా పోలీసులు, ప్రభుత్వం భానుకిరణ్ ఆచూకీ కనుక్కోక పోవడం దారుణమన్నారు. ఆసలు ఆయన బతికి ఉన్నాడో లేడోనని అనుమానం వ్యక్తం చేశారు. మస్తాన్‌రావు తన సూసైడ్ నోట్‌లో పేర్కొన్న వ్యక్తులపై ఇంత వరకు చర్యలు తీసుకోక పోవడాన్ని చంద్రబాబు ప్రశ్నించారు.