తెలంగాణపై కాంగ్రెసు నిర్ణయమే కీలకం, ఫిబ్రవరి మొదటివారంలో భేటీ

న్యూఢిల్లీ: తెలంగాణపై శ్రీకృష్ణ కమిటీ నివేదిక సిఫార్సులపై చర్చకు కేంద్ర హోం మంత్రి పి. చిదంబరం ఫిబ్రవరి మొదటివారంలో ఆంధ్రప్రదేశ్‌కు చెందిన అఖిల పక్ష భేటీని ఏర్పాటు చేసే అవకాశాలున్నాయి. పార్లమెంటు బడ్జెట్ సమావేశాల లోపే తెలంగాణపై ఏదో ఒక నిర్ణయం ప్రకటించాలనే ఉద్దేశంతో కేంద్ర ప్రభుత్వం ఉన్నట్లు సమాచారం. ఆర్థిక వేదిక సదస్సులో పాల్గొనడానికి హోం మంత్రి చిదంబరం స్విట్జర్లాండ్‌లోని దావోస్ వెళ్లారు. జనవరి 30వ తేదీన ఆయన ఢిల్లీకి తిరిగి వస్తారు. ఆయన తిరిగి వచ్చిన తర్వాత అఖిల పక్ష భేటీ తేదీని ఖరారు చేస్తారని సమాచారం. ఫిబ్రవరి 1వ తేదీన ప్రధాని మన్మోహన్ సింగ్ హోం మంత్రిత్వ శాఖ ఏర్పాటు చేసిన ముఖ్యమంత్రుల సమావేశంలో కూడా తెలంగాణ విషయాన్ని ప్రస్తావించే అవకాశాలున్నట్లు తెలుస్తోంది.

ఈ నెల 21వ తేదీన సోనియా, మన్మోహన్ సింగ్‌లతో సమావేశమైన కాంగ్రెసు కోర్ కమిటీ తెలంగాణపై విస్తృతంగా చర్చించింది. అయితే, అఖిల పక్ష సమావేశానికి ముందు ఆంధ్రప్రదేశ్ రాష్ట్రానికి చెందిన పార్లమెంటు సభ్యుల్లో తెలంగాణపై ఏకాభిప్రాయానికి చిదంబరం కసరత్తు చేస్తున్నారు. దీంతో గణతంత్ర దినోత్సవానికి ముందే జరగాల్సిన అఖిల పక్ష భేటీ వాయిదా పడింది. ఇంతకు ముందు నిర్వహించిన అఖిల పక్ష భేటీకి తెలంగాణ రాష్ట్ర సమితి (తెరాస), బిజెపి, తెలుగుదేశం గైర్హాజరయ్యారు. ఈ పార్టీ నుంచి ఒక్కరిని మాత్రమే పిలిస్తే తాము వస్తామని తెరాస నాయకులు చెబుతుండగా, బిజెపి శ్రీకృష్ణ కమిటీని తాము అంగీకరించడం లేదని అంటోంది. కమిటీ నివేదిక వచ్చిన తర్వాత తెలంగాణపై నిర్ణయం తీసుకోవాల్సింది కేంద్ర ప్రభుత్వమేనని, ఇంకా సంప్రదింపులు అనవసరమని తెలుగుదేశం పార్టీ అంటోంది.

మరో మారు అఖిల పక్ష సమావేశానికి ముందు కేంద్ర ప్రభుత్వం ఒక నిర్ణయానికి రావాలని, ఆ నిర్ణయాన్ని అఖిల పక్ష సమావేశంలో చెప్పాలని ఉభయ కమ్యూనిస్టు పార్టీల నాయకులు చెప్పారు. పార్టీ నుంచి ఇద్దరు ప్రతినిధులను ఆహ్వానించడం వల్ల సమస్య పరిష్కారం కాదని సిపిఐ, సిపిఎం నాయకులు కూడా అంటున్నారు. ఈ స్థితిలో కాంగ్రెసు నిర్ణయమే కీలకంగా మారింది. దీంతో అఖిలపక్ష భేటీలో జాప్యం జరుగుతూ వస్తోంది.

English summary

The much-awaited meeting of eight political parties of Andhra Pradesh to discuss the recommendations of the Srikrishna Committee on Telangana and find out a solution acceptable to all is likely to be held early next month.Sources said the government would like to take a decision on the recommendations of the panel possibly before the Budget Session of Parliament starting in February-end.