రచ్చబండ వర్సెస్ వైయస్ఆర్ రచ్చబండ: సిఎంపై జగన్ వర్గం అటాక్

చిత్తూరు: మాజీ పార్లమెంటు సభ్యుడు వైయస్ జగన్మోహన్ రెడ్డి వర్గం నేతలు ముఖ్యమంత్రి కిరణ్‌కుమార్ రెడ్డితో ఢీ అంటే డీ అంటున్నారు. నిన్నటి వరకు ముఖ్యమంత్రిపైన, ప్రభుత్వంపైన విరుచుకుపడ్డ జగన్ వర్గం నేతలు శుక్రవారం మరో అడుగు వేశారు. ప్రభుత్వం ప్రతిష్టాత్మకంగా నిర్వహిస్తోన్న రచ్చబండ కార్యక్రమాన్ని వారు అటాక్ చేసే పనిలో పడ్డారు. ముఖ్యమంత్రి సొంత జిల్లాకు చెందిన గంగాధరం నెల్లూరు నియోజకవర్గానికి చెందిన శాసనసభ్యురాలు కుతూహలమ్మ తన నియోజకవర్గంలోని ఎస్ఆర్‌పురంలో పోటీ రచ్చబండను ఏర్పాటు చేశారు. దానికి వైయస్ఆర్ రచ్చబండ అని నామకరణం చేశారు.

ప్రభుత్వం ఏర్పాటు చేసిన రచ్చబండ కాకుండా ఎమ్మెల్యే దివంగత ముఖ్యమంత్రి వైయస్ రాజశేఖరరెడ్డి పేరున వైయస్ఆర్ రచ్చబండ కార్యక్రమాన్ని ఏర్పాటు చేసి కార్యక్రమాలలో పాల్గొంటుంది. కాగా ముఖ్యమంత్రి కిరణ్ తన మంత్రివర్గంలో కుతూహలమ్మకు చోటు ఇవ్వకపోవడంపై ఆమె తీవ్ర ఆగ్రహం వ్యక్తం చేసిన విషయం తెలిసిందే. తను దళితురాలినని, డబ్బుగల దానిని కానందునే తనకు మంత్రి పదవి ఇవ్వలేదని ఆరోపణలు చేశారు. అనంతరం జగన్ వర్గంవైపు వెళ్లనప్పటికీ వెళ్లే దిశలో ఆలోచన ఉన్నట్లు చెప్పారు.