సూరి హత్య కేసు, వీడిన చిక్కుముడి: భాను తప్ప ఇతరుల అరెస్టు?

హైదరాబాద్: మద్దెలచెర్వు సూరి హత్య కేసు చిక్కుముడి వీడినట్లు తెలుస్తోంది. సూరి హత్య కేసులో భాను సహా ఐదుగురి ప్రమేయాన్ని పోలీసులు గుర్తించినట్లు వార్తలు వస్తున్నాయి. భాను సహా మిగతా నలుగురిని అరెస్టును పోలీసులు ఒకటి రెండు రోజుల్లో చూపిస్తారని అంటున్నారు. సూరి హత్య కేసులో కారును నడిపిన మధు పాత్ర ఉందని కూడా పోలీసులు గుర్తించినట్లు తెలుస్తోంది. మధు, న్యాయవాది శ్రీకాంత్ గౌడ్, సుబ్బయ్య, లోకనాథ్‌లపై పోలీసులు కేసు నమోదు చేయనున్నట్లు తెలుస్తోంది.

సూరి హత్యకు వాడిన రివాల్వర్‌ను పోలీసులు స్వాధీనం చేసుకున్నారు. ఈ నెల 3వ తేదీన సూరి హత్య జరిగిన విషయం తెలిసిందే. అప్పటి నుంచి కేసులో ప్రధాన నిందితుడు భాను కిరణ్ పరారీలో ఉన్నాడు. మిగతా నలుగురు పోలీసుల అదుపులో ఉన్నట్లు తెలుస్తోంది. భాను కోసం పోలీసులు విస్తృతంగా గాలిస్తున్నారు. సూరి హత్య తర్వాత భాను, అతని గన్‌మన్ లోకనాథ్, అనుచరుడు సుబ్బయ్య కలిసి పారిపోయారు. అయితే లోకనాథ్, సుబ్బయ్యలను పోలీసులు పట్టుకున్నట్లు తెలుస్తోంది.