మాది సినిమా పార్టీ కాదు: కాంగ్రెసులో విలీనం వార్తలపై కెసిఆర్

హైదరాబాద్: తెలంగాణ రాష్ట్ర సమితి రెండు లక్ష్యాల కోసం ఉద్యమిస్తుందని సోమవారం తెలంగాణ రాష్ట్ర సమితి అధ్యక్షుడు కె చంద్రశేఖరరావు టిఆర్ఎస్ భవన్‌లో ఏర్పాటు చేసిన విలేకరుల సమావేశంలో స్పష్టం చేశారు. తెలంగాణ రాష్ట్రం ఏర్పాటుకు ఉద్యమించడం మొదటి లక్ష్యం, రాష్ట్రం ఏర్పడిన తర్వాత పునర్నిర్మాణం రెండో లక్ష్యం అన్నారు. టిఆర్ఎస్ ఏ పార్టీలో విలీనం కాదని స్పష్టం చేశారు. కాంగ్రెస్‌లో విలీనంపై తాను గతంలో చెప్పానని అయితే ఇప్పుడు అలాంటి ఆలోచన లేదన్నారు. 2004 ఎన్నికలకు ముందు ఎలాంటి రక్తపాతం లేకుండా కేంద్రం తెలంగాణ ప్రకటిస్తే టిఆర్ఎస్ ఉన్నా లేకున్నా ఒకటే అన్నట్టు ఉండేవాడినని, తెలంగాణ ప్రకటిస్తే కాంగ్రెస్‌లో విలీనం చేస్తానని అందుకే చెప్పానన్నారు. అయితే ఇప్పుడు రాష్ట్రం రాకపోగా నాలుగువందలకుపైగా విద్యార్థుల మరణించారని, అరెస్టులు జరుగుతున్నాయని ఇలాంటప్పుడు మేం కాంగ్రెస్‌లో విలీనం అయ్యేది లేదన్నారు.

ప్రస్తుతం టిఆర్ఎస్‌లోకి భారీ వలసలు ఉన్నాయన్నారు. టిఆర్ఎస్ రోజురోజుకు బలపడుతుందన్నారు. బలమైన పార్టీకి మరో పార్టీలో విలీనం చేయాల్సిన అవసరం లేదన్నారు. మాది ప్రత్యేకమైన ఉద్యమ పార్టీ అన్నారు. సినిమా పార్టీ కాదని చిరంజీవి ప్రజారాజ్యం పార్టీని ఎద్దేవా చేశారు. చిరు ఇప్పుడు కాంగ్రెస్ కార్యకర్త కాబట్టి తెలంగాణపై అధిష్టానం మాటకు కట్టుబడి ఉండాల్సి ఉంటుందన్నారు. ఆంతేకానీ ఆయన సమైక్య నినాదానికి ఇప్పుడు సంబంధం లేదన్నారు. టిఆర్ఎస్ కాంగ్రెస్‌లో కలుస్తుందన్న కెకె వ్యాఖ్యలు అర్థరహితం అన్నారు. కెకె కామెంట్ ఈ సంవత్సరపు ఉత్తమ జోక్ అన్నారు. తెలంగాణ కోసం త్వరలో ఉద్యమం తీవ్రతరం చేస్తామన్నారు. మీడియాకు చేతినిండా వార్తలు ఉంటాయన్నారు.

ప్రభుత్వం వెంటనే చేనేత కార్మికులను ఆదుకోవాలని ఆయన డిమాండ్ చేశారు. పోచంపల్లి, గద్వాలలో సిల్కు బోర్డులుఏర్పాటు చేయాలన్నారు. సిరిసిల్ల ఆకలి చావులపై ప్రభుత్వం కళ్లు తెరవాలన్నారు. తమిళనాడు ప్రభుత్వం తరహాలో ఎపి ప్రభుత్వం చేనేత కార్మికులను ఆదుకోవాలన్నారు. మార్చి 9వరకు చేనేత కార్మికులను ఆదుకోకుంటే మార్చి 9న రహదారుల దిగ్బంధం చేస్తామన్నారు. విజయవాడ రహదారిని దిగ్బంధిస్తామన్నారు. మార్చి 10న తెలంగాణ బంద్ పాటిస్తామని చెప్పారు. మధ్యంతర ఎన్నికలు వస్తే జగన్‌కు ఎక్కువ సీట్లే వస్తాయని, తెరాసకు 53 శాతం బలం ఉందని సర్వేల్లో తేలిందని ఆయన చెప్పారు.