పీఆర్పీ తర్వాత ఇక టిఆర్ఎస్ వంతు: టిడిపి నేత దేవేందర్ గౌడ్

By Srinivas

Published: Tuesday, February 8, 2011, 14:55 [IST]

హైదరాబాద్: ప్రజారాజ్యం పార్టీ కాంగ్రెసు‌లో విలీనం అయిందని ఇక తర్వాత తెలంగాణ రాష్ట్ర సమితిని వంతు అని తెలుగుదేశం పార్టీ సీనియర్ నాయకుడు దేవేందర్ గౌడ్ మంగళవారం విలేకరుల సమావేశంలో అన్నారు. కాంగ్రెసు‌లో ఇప్పుడు పీఆర్పీ విలీనం అయిందని, ఇక మిగిలింది టీఆర్ఎస్సే అన్నారు. టిఆర్ఎస్, కాంగ్రెసు ఎజెండా తెలుగుదేశాన్ని బలహీన పర్చడమేనన్నారు. ఆ రెండు పార్టీలు అధికారికంగా కలవనప్పటికీ కలిసే పని చేస్తున్నాయన్నారు. కెసిఆర్ సైతం గతంలో కాంగ్రెసు‌ను బలోపేతం చేయడమే తన లక్ష్యమని బాహాటంగా చెప్పారని గుర్తు చేశారు.

కాంగ్రెసు సీనియర్ నాయకుడు కె కేశవరావు తాజాగా చేసిన వ్యాఖ్యలు కూడా దీనిని ధృవీకరిస్తున్నాయన్నారు. ముఖ్యంగా కాంగ్రెసు రాష్ట్రంలో టిడిపిని బలహీన పర్చడమే ఎజెండాగా పెట్టుకున్నదన్నారు. నిన్నటి వరకు ప్రత్యేక తెలంగాణ తన లక్ష్యమని ప్రకటిస్తూ వచ్చిన కెసిఆర్ ఇప్పుడు తెలంగాణ వచ్చిన తర్వాత రాష్ట్రం పునర్నిర్మాణం అనే మాట మాట్లాడుతున్నారన్నారు. తెలంగాణ రాకముందే కెసిఆర్ అధికారం గురించి మాట్లాడుతున్నారన్నారు.

Published On February 8, 2011