Viral Video: ఇదేం పిచ్చి.. చనిపోయిన తండ్రికి కూతురి వింత నైవేద్యం! (వీడియో)

Viral Video: హిందూ సంప్రదాయాల ప్రకారం పితృకార్యాలు లేదా చనిపోయిన పెద్దలకు పెట్టే తిథి వేడుకలకు ఎంతో ప్రాధాన్యత ఉంది. ఈ రోజుల్లో దివంగతులైన తల్లిదండ్రులను స్మరించుకుంటూ వారికి ఇష్టమైన పిండివంటలను, ఆహార పదార్థాలను అత్యంత భక్తిశ్రద్ధలతో నైవేద్యంగా పెట్టడం తరతరాలుగా వస్తున్న ఆనవాయితీ. సాధారణంగా పండ్లు, పాయసం, లడ్డూలు లేదా వారు ఇష్టంగా తినే శాకాహార, మాంసాహార వంటకాలను నైవేద్యంగా పెడుతుంటారు. అయితే ఇటీవల ఓ యువతి తన దివంగత తండ్రికి సమర్పించిన ఓ వింత నైవేద్యం ఇప్పుడు సోషల్ మీడియాలో పెద్ద ఎత్తున చర్చకు, వివాదానికి దారితీసింది. ఆ యువతి తన తండ్రి ఫోటో ముందు సాంప్రదాయ వంటకాలతో పాటు ఓ సిగరెట్‌ను వెలిగించి నైవేద్యంగా సమర్పించడం అందరినీ ఆశ్చర్యానికి గురిచేస్తోంది.

ప్రస్తుతం ఇంటర్నెట్ లో విపరీతంగా వైరల్ అవుతున్న ఆ వీడియోలో సాంప్రదాయబద్ధంగా చీర కట్టుకున్న ఓ యువతి తన తండ్రి చిత్రపటానికి పూజ చేయడాన్ని మనం చూడవచ్చు. అక్కడ ఒక పీటపై తండ్రి ఫోటో ఉంచి, దానికి పూలమాల వేసి, చుట్టూ పండ్లు, స్వీట్లు, భోజనం వంటి రకరకాల సాంప్రదాయ వంటకాలను సిద్ధం చేసి ఉంచారు. ఇక్కడివరకు అంతా బాగానే ఉన్నా.. ఆ తర్వాత జరిగిన దృశ్యమే అందరినీ ముక్కున వేలేసుకునేలా చేసింది. ఆ యువతి ఒక సిగరెట్‌ను చేతిలోకి తీసుకుని, అగ్గిపెట్టెతో దానిని నోట్లో పెట్టుకుని వెలిగించి, పొగ వస్తుండగానే తండ్రి ఫోటో ముందున్న నైవేద్యాల ప్లేటులో భక్తిగా ఉంచింది. ఆపై ఆమె చాలా సాధారణంగా తన తండ్రికి నమస్కరిస్తూ పూజను ముగించింది. ఈ వీడియోలో బ్యాక్‌గ్రౌండ్‌లో ఓ భక్తి పాట రావడం ఈ వింత దృశ్యాన్ని మరింత విచిత్రంగా మార్చేసింది.

ఈ వీడియో సోషల్ మీడియాలోకి వచ్చిన కొద్దిసేపటికే నెటిజన్లు దీనిపై భిన్నమైన అభిప్రాయాలతో విరుచుకుపడుతున్నారు. సాంప్రదాయాలను గౌరవించే మెజారిటీ ప్రజలు దీనిని తీవ్రంగా తప్పుబడుతున్నారు. "రోజురోజుకీ మనుషులకు పిచ్చి ముదురుతోంది.. కనీస సంస్కారం, విచక్షణ లేకుండా పూజా స్థలంలో సిగరెట్లు వెలిగించి నైవేద్యం పెట్టడం ఏంటి?" అని నెటిజన్లు ఆగ్రహం వ్యక్తం చేస్తున్నారు. భక్తి, పూజల పేరిట ఇలాంటి పిచ్చి పనులు చేయడం వల్ల మన పవిత్రమైన సంప్రదాయాలను అవమానించడమే అవుతుందని, కేవలం సోషల్ మీడియాలో వ్యూస్, లైకుల కోసం ఇలాంటి స్టంట్లు చేస్తున్నారని మరికొందరు కామెంట్స్ చేస్తున్నారు. పూజ గదిలో పొగాకు ఉత్పత్తులను ఉంచడం అరిష్టమంటూ కొందరు మండిపడుతున్నారు. దానికి తోడు ఆమె ఆ వీడియోపై రాసిన క్యాప్షన్ కొంత మందికి కోపం తెప్పిస్తుండగా.. మరికొందరు నవ్వుకుంటున్నారు. ఆ వీడియోపై ఆమె.. "పాపా.. నువ్వు పైలోకంలో రంభ ఊర్వశి మేనకలు, ఇతరులతో సంతోషంగా ఉన్నావు కావచ్చు. అంతేకాకుండా వారికి ఫెమినిజం గురించి బోధిస్తున్నావు కావచ్చు" అంటూ రాసుకొచ్చింది.

చనిపోయిన తండ్రికి సిగరెట్ తో నైవేద్యం.🤦

రోజు రోజుకు మనుషులకి పిచ్చి ముదురుతోంది అనాలా లేక ఎవరి ఇష్టం వాళ్లది అంటారా 🫠 pic.twitter.com/xGaBxpz9gZ

— AVM (@AvmNews7) June 4, 2026

అయితే ఈ విమర్శలన్నింటికీ భిన్నంగా.. ఆ యువతి చేసిన పనిని సమర్థిస్తూ కొందరు నెటిజన్లు భిన్నమైన కోణంలో స్పందిస్తున్నారు. "చనిపోయిన వారికి బతికున్నప్పుడు ఏ అలవాట్లు ఉన్నాయో, వారికి ఏది ఇష్టమో.. దాన్నే నైవేద్యంగా పెట్టడం కొందరి కుటుంబాల నమ్మకం. ఇందులో తప్పుబట్టాల్సింది ఏమీ లేదు" అని వారు వాదిస్తున్నారు. చనిపోయిన తండ్రిపై ఆ కూతురికి ఉన్న ప్రేమే ఇక్కడ ముఖ్యం తప్ప, అక్కడ పెట్టిన వస్తువు మంచిదా కాదా అనేది కాదని, అది పూర్తిగా ఆమె వ్యక్తిగత ఇష్టమని కొందరు మద్దతుగా నిలుస్తున్నారు. ఏదేమైనప్పటికీ, ఈ 'సిగరెట్ నైవేద్యం' వీడియో మాత్రం ప్రస్తుతం ఇంటర్నెట్‌లో ఒక రేంజ్‌లో ట్రెండ్ అవుతూ, సంప్రదాయాలు వర్సెస్ వ్యక్తిగత నమ్మకాలపై ఒక పెద్ద చర్చకే తెరలేపింది.

English summary

A viral video of a woman offering a lit cigarette along with traditional food to her deceased father during a ritual with a quirky caption triggers an internet debate.