హసన్ అలీ పారిపోకుండా చూడండి: కేంద్రానికి సుప్రీంకోర్టు ఆదేశం

By Pratap

Published: Thursday, February 10, 2011, 14:20 [IST]

న్యూఢిల్లీ: మనీ లాండరింగ్ కేసులో నిందితుడైన పూణేకు చెందిన వ్యాపారి హసన్ అలీ దేశం విడిచి వెళ్లకుండా చూడాలని సుప్రీంకోర్టు కేంద్ర ప్రభుత్వాన్ని ఆదేశించింది. ఎన్‌ఫోర్స్‌మెంట్ డైరెక్టరేట్ విచారణ పూర్తి కాకుండానే తన భార్య పేరును వాడుకుని స్విస్ బ్యాంక్ నుంచి 8 మిలియన్ల అమెరికా డాలర్లను స్వీస్ బ్యాంకు నుంచి మార్పిడి చేసిన హసన్ అలీని దేశం నుంచి వెళ్లిపోవడానికి ప్రభుత్వం అనుతించిందని రాంజెత్మాలనీ, ఇతర పిటిషనర్లు ఆరోపించారు.

దీంతో హసన్ అలీ దేశం విడిచి వెళ్లకుండా చూడాలని న్యాయమూర్తులు బి. సుదర్శన్ రెడ్డి, ఎస్ఎస్ నిజ్జార్‌లతో కూడిన సుప్రీంకోర్టు బెంచ్ గురువారం కేంద్రాన్ని ఆదేశించింది. కేసులు నమోదైన తర్వాత నల్లధనాన్ని దాచిన వారి పేర్లను వెల్లడిస్తామని ఇచ్చిన హామీని ప్రభుత్వం ఎందుకు నిలబెట్టుకోలేదని సుప్రీంకోర్టు ప్రశ్నించింది. హసన్ అలీ దేశంలోనే ఉన్నాడని, దేశం విడిచి వెళ్లడానికి అనుమతి ఇవ్వబోమని కేంద్ర ప్రభుత్వం కోర్టుకు తెలిపింది.

Published On February 10, 2011