తెలంగాణ అంశం కెసిఆర్ సొత్తు కాదు: సిపిఐ జాతీయ నేత రాజా

By Srinivas

Published: Tuesday, February 22, 2011, 14:38 [IST]

న్యూఢిల్లీ: తెలంగాణ అంశం తెలంగాణ రాష్ట్ర సమితి అధ్యక్షుడు కె చంద్రశేఖరరావు సొత్తు కాదని సిపిఐ జాతీయ నేత డి.రాజా మంగళవారం న్యూఢిల్లీలో ధ్వజమెత్తారు. తెలంగాణపై ప్రతి పార్టీకి ఒక అభిప్రాయం ఉందన్నారు. కెసిఆర్ రేపు పెట్టబోయే తీర్మానానికి మేం ఎందుకు మద్దతు ఇవ్వాలని ఆయన ప్రశ్నించారు. కెసిఆర్ తీర్మానానికి మద్దతు ఇవ్వాల్సిన అవసరం సిపిఐ పార్టీకి లేదన్నారు. కేంద్రం ప్రభుత్వం చొరవ తీసుకొని తెలంగాణకు అనుకూలంగా బిల్లు ప్రవేశ పెడితే మేం మద్దతు ఇస్తామని చెప్పారు. తెలంగాణకు సిపిఐ కట్టుబడి ఉందన్నారు. ప్రజల మనోభావాలను అన్ని పార్టీలు గౌరవించాల్సిందేనని చెప్పారు.

కెసిఆర్ తెలంగాణ తీర్మానానికి మా మద్దతు ఉంటుందని భారతీయ జనతా పార్టీ నేత ప్రకాశ్ జవదేకర్ స్పష్టం చేశారు. ఇప్పటి వరకు బిల్లు ప్రవేశ పెట్టకుండా కాంగ్రెస్ పార్టీ తెలంగాణ ప్రజలను తీవ్రంగా మోసం చేస్తుందన్నారు. తెలంగాణ ప్రజలు చేస్తున్న ఆందోళనలను బిజెపి స్వాగతిస్తుందని, అలాగే మద్దతు కూడా ప్రకటిస్తుందని చెప్పారు. కెసిఆర్ తీర్మానం ప్రవేశ పెట్టినట్లే బిజెపి సైతం మంగళవారం తెలంగాణపై ఓ తీర్మానం ప్రవేశ పెడుతుందన్నారు.

Published On February 22, 2011