తెలంగాణ అంశాన్ని లోకసభలో ప్రస్తావించిన కెసిఆర్

By Pratap

Published: Tuesday, February 22, 2011, 11:45 [IST]

న్యూఢిల్లీ‌: తెలంగాణ అంశంపై తక్షణ చర్చకు తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు మంగళవారం లోకసభలో వాయిదా తీర్మానాన్ని ప్రతిపాదించారు. అయితే, దాన్ని స్పీకర్ మీరాకుమార్ తిరస్కరించారు. 2జి స్పెక్ట్రమ్ కుంభకోణంపై జెపిసిని వేస్తామని ప్రధాని డాక్టర్ మన్మోహన్ సింగ్ ప్రకటించిన తర్వాత దానిపై చర్చకు స్పీకర్ అనుమతించారు. దానిపై చర్చకు అనుమతించారు. ఈ సమయంలో కెసిఆర్ - తాను వాయిదా తీర్మానాన్ని ప్రతిపాదించిన విషయాన్ని గుర్తు చేస్తూ తనకు మాట్లాడే అవకాశం ఇవ్వాలని స్పీకర్‌ను కోరారు. తనకు అవకాశం కల్పించాలని కోరుతూ ఆయన స్పీకర్ పోడియం వద్దకు చేరుకున్నారు. తెలంగాణ అంశాన్ని జీరో అవర్‌లో ప్రస్తావించాలని మీరా కుమార్ కెసిఆర్‌కు సూచించారు. దాంతో ఆయన నెమ్మదించారు.

తెలంగాణ తీర్మానం కోసం ముఖ్యమంత్రి కిరణ్ కుమార్ రెడ్డి సహకరించాలని కెసిఆర్ అంతకు ముందు మీడియా ప్రతినిధుల సమావేశంలో కోరారు. నాలుగు లక్షల మంది సహాయ నిరారణలో పాల్గొంటున్నట్లు ఆయన తెలిపారు. తాను వాయిదా తీర్మానం ప్రతిపాదించానని, దాన్ని అనుమతించకపోతే స్పీకర్ పోడియం వద్ద బైఠాయిస్తానని ఆయన చెప్పారు. తెలంగాణపై ఇప్పటికైనా ముఖ్యమంత్రి వాస్తవ పరిస్థితులతో కేంద్రానికి నివేదిక సమర్పించాలని ఆయన డిమాండ్ చేశారు. కేంద్ర ప్రభుత్వం డిసెంబర్ 9వ తేదీ ప్రకటనకు కట్టుబడాలని ఆయన డిమాండ్ చేశారు.

Published On February 22, 2011