28 తర్వాత తెలంగాణపై పార్లమెంటులో చర్చ: కేశవరావు

By Pratap

Published: Wednesday, February 23, 2011, 15:54 [IST]

న్యూఢిల్లీ‌: తెలంగాణపై ఈ నెల 28వ తేదీ తర్వాత పార్లమెంటులో చర్చ జరుగుతుందని కాంగ్రెసు తెలంగాణ ప్రాంత పార్లమెంటు సభ్యుడు కె. కేశవ రావు చెప్పారు. కేంద్ర మంత్రి ప్రణబ్ ముఖర్జీని రెండోసారి కాంగ్రెసు తెలంగాణ ప్రాంత పార్లమెంటు సభ్యులు కలిశారు. తెలంగాణ అంశంపై దుమారం చెలరేగి లోకసభ వాయిదా పడిన తర్వాత కాంగ్రెసు తెలంగాణ ప్రాంత పార్లమెంటు సభ్యులు ప్రధాని డాక్టర్ మన్మోహన్ సింగ్‌ను, పార్లమెంటరీ వ్యవహారాల మంత్రి పవన్ కుమార్ బన్సల్‌ను, కేంద్ర ఆర్థిక మంత్రి ప్రణబ్ ముఖర్జీని కలిశారు. ఆ తర్వాత రెండోసారి వారు ప్రణబ్ ముఖర్జీని కలిశారు. 28వ తేదీ తర్వాత తెలంగాణపై పార్లమెంటు చర్చ ఉంటుందని ప్రణబ్ ముఖర్జీ వారికి చెప్పారు. బడ్జెట్ సమావేశాలు ముగిసిన తర్వాత తెలంగాణపై చర్చ చేపడతామని ప్రణబ్ హామీ ఇచ్చినట్లు కాంగ్రెసు తెలంగాణ ప్రాంత పార్లమెంటు సభ్యులు వివేక్, మధుయాష్కీ చెప్పారు.

అంతకు ముందు లోకసభలో ఆందోళనకు దిగిన తమ కాంగ్రెసు పార్టీ తెలంగాణ పార్లమెంటు సభ్యులను బుజ్జగించేందుకు ప్రధాని డాక్టర్ మన్మోహన్ సింగ్ ప్రయత్నించారు. తెలంగాణ అంశంపై ఆందోళనతో లోకసభ వాయిదా పడిన తర్వాత కాంగ్రెసు తెలంగాణ పార్లమెంటు సభ్యులు ప్రధానిని కలిశారు. కేంద్ర మంత్రులు ప్రణబ్ ముఖర్జీ, పవన్ కుమార్ బన్సల్‌లను కూడా వారు కలిశారు. తెలంగాణ సీరియస్ అంశమని, తప్పకుండా నిర్ణయం తీసుకుంటామని, అప్పటి దాకా ఓపిక పట్టాలని ప్రధాని తెలంగాణ పార్లమెంటు సభ్యులకు చెప్పారు.

తనతో తెలంగాణ పార్లమెంటు సభ్యులు సమావేశమైన తర్వాత ప్రధాని కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీతో సమావేశమయ్యారు. తెలంగాణ పార్లమెంటు సభ్యులు చర్య సరైంది కాదని మొయిలీ అన్నారు. అయితే, కాంగ్రెసు తెలంగాణ పార్లమెంటు సభ్యులు తమ పట్టు వీడలేదు. అవసరమైతే రాజీనామాలు చేస్తామని వారు ప్రధానితో చెప్పినట్లు సమాచారం. తెలంగాణపై స్పష్టమైన ప్రకటన చేసే వరకు పార్లమెంటు సమావేశాలను అడ్డుకుంటామని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు చెప్పారు.

Published On February 23, 2011