తెలంగాణ ప్రకటించకుంటే కాంగ్రెసు‌కు కుక్కచావు: కెటిఆర్

By Srinivas

Published: Wednesday, February 23, 2011, 15:59 [IST]

హైదరాబాద్: కాంగ్రెసు పార్టీ అధ్వర్యంలోని యూపీఏ కేంద్ర ప్రభుత్వం వెంటనే తెలంగాణ ప్రకటించకుంటే కాంగ్రెసు పార్టీ తెలంగాణలో కుక్కచావు చస్తుందని తెలంగాణ రాష్ట్ర సమితి సిరిసిల్ల శాసనసభ్యుడు కల్వకుంట్ల తారకరామారావు బుధవారం హైదరాబాద్‌లో తెలంగాణ విద్యుత్ ఉద్యోగుల సభలో హెచ్చరించారు. ఉవ్వెత్తున ఎగుస్తున్న తెలంగాణ ఉద్యమం గవర్నర్ నరసింహన్‌కు కనిపించడం లేదా అని ప్రశ్నించారు. సీమాంధ్ర పెట్టబడిదారులు, గవర్నర్, డిజిపి అరవిందరావు కలిసి శ్రీకృష్ణ కమిటీ 8వ చాప్టర్‌ను తయారు చేశారని ఆరోపించారు. ప్రత్యేక తెలంగాణ రాష్ట్రం తప్పితే మరొకటి అవసరమే లేదని ఆయన అన్నారు. తెలంగాణ ఉద్యమం మరింత ఉప్పెనలా మారుతుందని అన్నారు.

తెలంగాణ ప్రజలు అసెంబ్లీని ఏమాత్రం గుర్తించడం లేదని టిఆర్ఎస్‌ఎల్పీ నేత ఈటెల రాజేందర్ అన్నారు. తెలంగాణలో రచ్చబండ కార్యక్రమం పూర్తిగా రచ్చరచ్చ అయినప్పటికీ గవర్నర్ మాత్రం విజయవంతమైందని కేంద్రానికి నివేదిక పంపారని చెప్పారు. తెలంగాణలో ఉన్న అన్ని విశ్వవిద్యాలయాలను పోలీసు క్యాంపులుగా మారుస్తున్నారని ఆరోపించారు.

Published On February 23, 2011