జగన్ దీక్షలో కిరాయి గోల: సంఘీభావం తెలిపితే రోజుకు రూ.200!

By Srinivas

Published: Thursday, February 24, 2011, 11:07 [IST]

హైదరాబాద్: విద్యార్థుల ఫీజు రీయింబర్స్‌మెంట్స్‌పై మాజీ పార్లమెంటు సభ్యుడు వైయస్ జగన్మోహన్ రెడ్డి ఇందిరాపార్కు వద్ద చేస్తున్న వరలక్ష్మీ దీక్షా ప్రాంగణం బుధవారం కాస్త దినసరి కూలీల కిరాయి గోలగా మారింది. ఫీజుపోరులో కిరాయిగోల వినిపించిందని ప్రముఖ తెలుగు దినపత్రిక ప్రచురించింది. ఫీజు రీయింబర్స్‌మెంట్స్ కోసం జగన్ చేస్తున్న దీక్షకు వచ్చి సంఘీభావం ప్రకటిస్తే రోజుకు రూపాయలు 200 రూపాయలు ఇస్తామని ఓ మహిళ చెప్పారని, ఆ మహిళ మాత్రం తమను ఇక్కడ దించివేసి తాను కనిపించకుండా వెళ్లిపోయిందని కొందరు మహిళలు జగన్ చేస్తున్న ఫీజు పోరు దీక్షా ప్రాంగణంలోనే ఆరోపించినట్టు వార్త వచ్చింది. దోమలగూడ డివిజన్‌కు చెందిన కొందరు మహిళలు కొందరు తమ ప్రాంతం మహిళ తమను డబ్బులు ఇస్తామని అక్కడకు తీసుకు వచ్చిందని ఆరోపించారు. డబ్బులు ఇవ్వాలంటూ మహిళలు అక్కడే పట్టుబట్టడంతో సదరు మహిళా అక్కడినుండి వెళ్లినట్టుగా తెలుస్తోంది.

కాగా జగన్ చేస్తున్న దీక్షను ప్రభుత్వం పట్టించుకోక పోవడమే కాకుండా, జనాధరణ లేదని పలువురు చేస్తున్న ఆరోపణలకు ఇవి బలాన్నిస్తున్నాయి. జగన్ దీక్షకు భారీగా జనాలు వస్తున్నారని ఆయన వర్గం నేతలు చెబుతున్నప్పటికీ వారిలో కూడా కొంత ఆందోళన కనిపిస్తోంది. తీవ్ర అసంతృప్తికి లోనయ్యే వారు ప్రభుత్వం జగన్‌ను పట్టించుకోవడం లేదని ఆరోపిస్తున్నట్టుగా కూడా ఉంది.

Published On February 24, 2011