కోదండరామ్ పై నారాయణ అసంతృప్తి: కెకెతో రహస్య మంతనాలపై ప్రశ్న

By Srinivas

Published: Wednesday, March 2, 2011, 14:36 [IST]

హైదరాబాద్: తెలంగాణ రాజకీయ జాయింట్ యాక్షన్ కమిటీ చైర్మన్ కోదండరామ్ తీరుపై సిపిఐ నేత నారాయణ తన అసంతృప్తిని వ్యక్తపరిచారు. ఏలూరు పార్లమెంటు సభ్యులు కావూరి సాంబశివరావు ఇంట్లో సీమాంధ్ర ఎంపీలు భేటీ కావడాన్ని అడ్డుకుంటామనడాన్ని ఆయన తప్పు పట్టారు. వారి సమావేశాలను అడ్డుకోవడం సరికాదన్నారు. అలా అయితే కాంగ్రెస్ సీనియర్ నాయకుడు కె కేశవరావుతో కోదండరాం ఎందుకు భేటీ అయ్యారని ప్రశ్నించారు. ఆయనతో రహస్య మంతనాలు ఎందుకు జరిపారన్నారు. కేంద్ర మంత్రి చిదంబరం వ్యాఖ్యలు బాధ్యతారాహిత్యంగా ఉన్నాయన్నారు.

అఖిలపక్షం భేటీలో మా అభిప్రాయం మేం చెప్పామన్నారు. అయితే అంతిమంగా కేంద్రమే నిర్ణయం తీసుకోవాలని అన్నారు. శ్రీకాకుళం జిల్లా ఈస్ట్ కోస్ట్ థర్మల్ ప్రాజెక్టును అడ్డుకుంటున్న సామాన్యులపై పోలీసుల దౌర్జన్యకాండను ఆయన ఖండించారు. కాకరాపల్లి, వట్టితాండ్రల పాపం ప్రభుత్వానిదే అన్నారు.త శ్రీకాకుళం జిల్లా ధర్మాన ప్రసాదరావు జిల్లా ప్రజల పాలిట రాబందులా మారాడన్నారు. పరిస్థితులు చూస్తుంటే రాష్ట్రాన్ని దున్నపోతులు పాలిస్తున్నాయన్న అనుమానం నిజం అనిపిస్తుందన్నారు. కాల్పులకు బాధ్యులైన వారిపై నాన్ బెయిలబుల్ వారెంట్ జారీ చేయాలన్నారు.

Published On March 2, 2011