తెలంగాణలో ప్రభుత్వం ఏది: భాజపా నేత విద్యాసాగర్ రావు

By Srinivas

Published: Thursday, March 3, 2011, 14:36 [IST]

న్యూఢిల్లీ\హైదరాబాద్: తెలంగాణలో ప్రభుత్వమే లేదని భారతీయ జనతా పార్టీ సీనియర్ నాయకుడు సిహెచ్ విద్యాసాగర్ రావు గురువారం న్యూఢిల్లీలో విలేకరులతో మాట్లాడుతూ చెప్పారు. ఇప్పటికే దేవాదాయ శాఖ మంత్రి జూపల్లి రాజీనామా చేశారన్నారు. మిగిలిన మంత్రులు కూడా ఆయన బాటలో వెళ్లడానికి సిద్ధంగా ఉంటారని ఆయన అన్నారు. తెలంగాణ అంశంపై కేంద్రం ప్రభుత్వం నియమించిన శ్రీకృష్ణ కమిటీకి రాజ్యాంగబద్దత లేదన్నారు. అలాంటి కమిటీలను మేం పట్టించుకోమన్నారు. ఈ బడ్జెట్ సమావేశాలలో తెలంగాణ బిల్లు పెట్టాలని ఆయన డిమాండ్ చేసారు.

తెలంగాణ ప్రాంతంలోని కాంగ్రెస్ పార్టీ ప్రజా ప్రతినిధులు మంత్రులు అందరూ కూడా దేవాదాయశాఖ మంత్రి జూపల్లి కృష్ణారావు బాటలో నడవాలని తెలంగాణ ఐక్య కార్యాచరణ సమితి చైర్మన్ ప్రొఫెసర్ కోదండరామ్ గురువారం మీడియా ప్రతినిధులతో మాట్లాడుతూ కోరారు. జూపల్లి కృష్ణారావు తన మంత్రి పదవికి రాజీనామా చేయడాన్ని స్వాగతిస్తున్నట్టు కోదండరామ్ చెప్పారు. అయితే ఆయన ఏఐసిసి అధ్యక్షురాలు సోనియాగాంధీకి కాకుండా గవర్నర్ నరసింహన్‌కు తన రాజీనామాను ఇవ్వాలని ఆయన కోరారు.

ఏలూరు పార్లమెంటు సభ్యులు కావూరి సాంబశివరావుకు తెలంగాణ ప్రజా ప్రతినిధుల గురించి మాట్లాడే హక్కు లేదన్నారు. ఆయన ముందుగా రాజీనామా చేసి మిగిలిన వారి గురించి మాట్లాడితే బావుండేదన్నారు. కేంద్ర ప్రభుత్వం తెలంగాణలో బిల్లు పెట్టే వరకు తెలంగాణ ప్రజలు తమ ఉద్యమాన్ని కొనసాగిస్తారని హెచ్చరించారు. ఈ బడ్జెట్ సమావేశాలలో తెలంగాణ బిల్లు పెట్టి కేంద్రం తమ చిత్తశుద్ధిని నిరూపించుకోవాలని డిమాండ్ చేశారు.

Published On March 3, 2011