కోదండరామ్ ఇదేనా నీ చదువు, కెసిఆర్ సమాధానం చెప్పు: దేవినేని ఉమ

హైదరాబాద్: ప్రత్యేక తెలంగాణ రాష్ట్రం ఉద్యమం పేరుతో కోదండరామ్ రాజ్యాంగ వ్యతిరేక కార్యకలాపాలకు పాల్పడుతున్నారని తెలుగుదేశం పార్టీ సీమాంధ్ర శాసనసభ్యులు దేవినేని ఉమామహేశ్వరరావు, ఆనందబాబు తదితరులు శుక్రవారం అసెంబ్లీ మీడియా పాయింట్ వద్ద ధ్వజమెత్తారు. అసెంబ్లీకి పిండ ప్రధానం చేయడమే కోదండరామ్ చదువుకున్న చదువా అని ప్రశ్నించారు. ఇదేనా ని విజ్ఞత అన్నారు. విద్యార్థుల పరీక్షల దృష్ట్యా తాము సమైక్యాంధ్ర ఉద్యమంపై సంయమనంతో వ్యవహరిస్తున్నామని చెప్పారు.

సమైక్యాంధ్ర కోసం రాజీనామాలు మాత్రమే కాదని ప్రాణాలు అర్పించడానికి కూడా సిద్ధమని చెప్పారు. ప్రత్యర్థులకు ఓటు వేసిన టిడిపి రెబల్ అభ్యర్థులు వెంటనే రాజీనామా చేయాలని వారు మాజీ పార్లమెంటు సభ్యుడు వైఎస్ జగన్మోహన్ రెడ్డి వర్గం, టిడిపి అసమ్మతి నేతలు నల్లపురెడ్డి ప్రసన్నకుమార్ రెడ్డి, బాలనాగిరెడ్డిలను ఉద్దేశించి డిమాండ్ చేశారు. తెలంగాణపై తమకు ఎంతో చిత్తశుద్ధి ఉందని చెప్పుకునే తెలంగాణ రాష్ట్ర సమితి అధ్యక్షుడు కె చంద్రశేఖరరావు ఇప్పుడు సమాధానం చెప్పాలని డిమాండ్ చేశారు.

ఎమ్మెల్సీ ఎన్నికల్లో స్వయంగా ముగ్గురు టిఆర్ఎస్ ఎమ్మెల్యేలే అమ్ముడు పోయారని దీనిపై ఏం చెబుతాని అన్నారు. తెలంగాణ కోసమంటూ గెలిచి గతంలో తొమ్మిదిమంది, ఇప్పుడు ముగ్గురు వేరే పార్టీలకు అమ్ముడు పోయారన్నారు. తెలంగాణ ఉద్యమం పట్ల టిఆర్ఎస్ చిత్తశుద్ధి ఏంటో దీంతో తేలిపోయిందన్నారు.

English summary

TDP senior MLA Devineni Uma Maheswara Rao and seemandhra MLAs questioned today telangana political jac chairman kodandaram attitude. They suspected TRS's Telangana stand.