శ్రీజ కేసు: ముందస్తు బెయిల్‌కు శిరీష్ భరద్వాజ్ దరఖాస్తు

హైదరాబాద్‌: ప్రజారాజ్యం అధినేత చిరంజీవి కూతురు శ్రీజ భరత్ శిరీష్‌ భరద్వాజ్‌ కట్నం వేధింపుల కేసులో ముందస్తు బెయిలు కోసం దరఖాస్తు చేసుకున్నారు. హైదరాబాద్‌ మహిళా పోలీస్‌ స్టేషన్‌లో ఆయనపై 498(ఏ), కట్నం వేధింపుల నిరోధక చట్టం 3, 4 కింద కేసులు నమోదైన విషయం తెలిసిందే. ఇవి బెయిలుకు వీలుకాని సెక్షన్లు కావడంతో నాంపల్లి క్రిమినల్‌ కోర్టులో ముందస్తు బెయిలు అభ్యర్థనను శిరీష్‌, ఆయన తల్లి సూర్యమంగళ పేర్లతో బుధవారం సమర్పించారు.

తమ దరఖాస్తుపై నిర్ణయం వెలువడేలోగా పోలీసులు అరెస్టు చేస్తారేమోనన్న అనుమానంతో శిరీష్‌, ఆయన తల్లి అజ్ఞాతంలోకి వెళ్లినట్లు సమాచారం. మహిళా పోలీసు అధికారులు గురువారం శిరీష్‌ ఇంటికి వెళ్లగా తాళం వేసి ఉంది. చుట్టుపక్కల వారిని ప్రశ్నించగా నాలుగు రోజుల క్రితమే శిరీష్‌ ఎక్కడికో వెళ్లాడని చెప్పారు. శిరీష్‌ బంధువుల ఇళ్లకు వెళ్లగా వారూ ఆచూకీ తెలియదని చెప్పడంతో తిరిగి వచ్చారు. ఇతర రాష్ట్రాలు, దేశాలకు వెళ్లకుండా నిరోధించేందుకు దేశంలోని ప్రధాన విమానాశ్రయాలకు లుక్‌అవుట్‌ నోటీసులు జారీ చేశారు.

English summary

Prajarajyam president Chiranjeevi's daughter Srija's husband Sirish Bharadwaj applied for anticipatory bail in dowry harassment case. Sirish with his mother Surya Mangala are absconding to avoid arrest.