రజనీకాంత్ మద్దతు కోసం తమిళ రాజకీయ పార్టీల పాట్లు

చెన్నై: సూపర్‌స్టార్ రజనీకాంత్ మద్దతు కోసం తమిళనాడులోని రాజకీయ పార్టీలు తీవ్ర ప్రయత్నాలు సాగిస్తున్నాయి. వివిధ రాజకీయ పార్టీల నాయకులు ఆయన చుట్టూ ప్రదక్షిణలు చేస్తున్నారు. ప్రధాన పార్టీలైన డీఎంకే, అన్నాడీఎంకేలు రజనీకాంత్ మద్దతు కోసం శాయశక్తులా ప్రయత్నిస్తున్నాయి. ఉపముఖ్యమంత్రి, డీఎంకే నాయకుడు స్టాలిన్ మంగళవారం రజనీకాంత్‌ను కలుసుకుని, దాదాపు అరగంటసేపు మాట్లాడారు. ఎన్నికల్లో మద్దతునివ్వాలని స్టాలిన్ కోరినా, ఆయనకు ఎలాంటి హామీ ఇవ్వకుండా 'అంతా మంచే జరుగుతుంది" అంటూ సాగనంపారు.

అన్నాడీఎంకే అధ్యక్షురాలు జయలలిత తరఫున 'తుగ్లక్" పత్రిక సంపాదకుడు చో రామస్వామి వారం రోజుల కిందట రజనీకాంత్‌ను కలుసుకున్నారు. ప్రత్యేకంగా ప్రచారం చేయాల్సిన పనిలేదని, అభిమానులకు సూచనప్రాయంగా చెబితే చాలని రామస్వామి అన్నట్లు సమాచారం. ఆయనకు కూడా రజనీకాంత్ ఎలాంటి హామీ ఇవ్వకుండానే 'పైన భగవంతుడు ఉన్నాడు" అని సాగనంపినట్లు తెలిసింది.

రెండు ప్రధాన పార్టీలూ తన మద్దతు కోసం తీవ్రంగా ప్రయత్నిస్తున్నా, రజనీకాంత్ మాత్రం ఎవరినీ నొప్పించకుండా తప్పించుకుంటున్నారు. రజనీకాంత్ తొలి సారిగా 1996లో తమిళనాడు అసెంబ్లీ ఎన్నికల్లో టీఎంసీ- డీఎంకే కూటమికి ఆయన ప్రచారం చేశారు. రజనీకాంత్ నుంచి ఓ మాట వస్తే చాలు, ఆయన అభిమానులు రంగంలోకి దూకుతారని తెలిసి పార్టీలు ఆ ప్రయత్నాలు సాగిస్తున్నాయి.

English summary

Tamilnadu political parties are trying to get super star Rajinikanth's support. DMK leader, deputy CM stalin met Rajinikanth recently, urged for support. Tuglak editor Cho Ramaswamy also met Rajini on behalf of Jayalalitha.