మైసూరా రెడ్డి నామినేషన్‌లో తెలంగాణ టిడిపి నేతల హల్‌చల్

By Srinivas

Published: Monday, April 18, 2011, 14:23 [IST]

కడప: కడప పార్లమెంటు అభ్యర్థిగా తెలుగుదేశం పార్టీ తరఫున సోమవారం ఎంవి మైసూరారెడ్డి నామినేషన్ వేసిన సమయంలో పలువురు తెలంగాణ ప్రజా ప్రతినిధులు పాల్గొన్నారు. సోమవారం నామినేషన్‌కు ఆఖరు తేది కావడంతో మైసూరారెడ్డి నామినేషన్ వేశారు. ఈ నామినేషన్ పర్వంలో తెలంగాణ నుండి వెళ్లిన పలువురు నేతలు పాల్గొన్నారు. ఖమ్మం పార్లమెంటు సభ్యుడు నామా నాగేశ్వరరావు, హుజురాబాద్ మాజీ ఎమ్మెల్యే పెద్దిరెడ్డి, ఎమ్మెల్యేలు ఎర్రబెల్లి దయాకరరావు, ఎల్.రమణ, మాజీ మేయర్ తీగల కృష్ణారెడ్డి తదితరులు పాల్గొన్నారు. పులివెందుల నియోజకవర్గం నుండి బిటెక్ రవి కూడా నామినేషన్ వేశారు.

కాగా కడప ప్రచారానికి వెళ్లిన వారిపై తెలంగాణ రాష్ట్ర సమితి నేతలు, తెలంగాణ రాజకీయ ఐక్య కార్యాచరణ సమితి నేతలు ధ్వజమెత్తుతున్నారు. టిడిపి ఎమ్మెల్యే నాగం జనార్ధన్ రెడ్డి కూడా కడప ప్రచారానికి వెళ్లడాన్ని తప్పుపట్టారు. అయితే టిడిపి నేతలు మాత్రం పార్టీ ఆదేశాలు పాటించాల్సిందేనని చెబుతున్నారు. అంతేకాదు తమ ప్రచారానికి వెళ్లవద్దన్న వారు తెలంగాణలో దోచుకున్న వేలకోట్ల ఆస్తులకు మద్దతు పలుకుతున్నట్లే అని ప్రతిదాడికి దిగుతున్నారు.

Published On April 18, 2011