2నెలల అనంతరం చంద్రబాబు ఇంటికి వెళ్లిన నాగం జనార్ధన్‌ రెడ్డి

By Srinivas

| Published: Wednesday, April 20, 2011, 12:50 [IST]

హైదరాబాద్: సుమారు రెండు నెలల దీర్ఘ కాలం తర్వాత తెలంగాణ తెలుగుదేశం పార్టీ సీనియర్ ఎమ్మెల్యే, మాజీ మంత్రి నాగం జనార్ధన్ రెడ్డి బుధవారం ఆ పార్టీ అధ్యక్షుడు నారా చంద్రబాబునాయుడు ఇంటికి వెళ్లారు. ఏప్రిల్ 20న చంద్రబాబు పుట్టిన రోజు కారణంగా నాగం జనార్ధన్ రెడ్డి ఆయనకు పుట్టిన రోజు శుభాకాంక్షలు తెలియజేసేందుకు బాబు ఇంటికి వెళ్లారు. బాబు ఇంటికి స్వయంగా వెళ్లి పుట్టిన రోజు శుభాకాంక్షలు తెలిపారు. ఈ సందర్భంగా ఆయన విలేకరులతో మాట్లాడారు.

చంద్రబాబుకు విషెస్ చెప్పేందుకే తాను వచ్చానని అన్నారు. తెలంగాణపై నిర్ణయం గురించి ప్రశ్నించగా తెలంగాణ విషయంలో తన వైఖరి మారదని స్పష్టం చేశారు. అయినా ఇప్పుడు రాజకీయాలు మాట్లాడటానికి సమయం కాదని ఆయన అన్నారు. కాగా గత కొంతకాలంగా నాగం - బాబు మధ్య అగాధం పెరుగుతున్న విషయం తెలిసిందే. ఓ సమయంలో తెలంగాణ విషయంలో బాబును ఎండగట్టినట్లు కూడా వార్తలు వచ్చాయి. నాగం టిడిపి వైఖరిని తప్పు పట్టడం ద్వారా చంద్రబాబుకు మింగుడు పడకుండా చేస్తున్నారు. దీంతో పలు సందర్భాల్లో బాబు నాగంపై పార్టీ కార్యక్రమాల్లో ఆగ్రహం వ్యక్తం చేశారు.

నాగం సొంతగా త్వరలో తెలంగాణలో పాదయాత్ర కూడా చేపట్టనున్నారు. దీనికి ఎదుర్కొనడానికి టిడిపి చైతన్య యాత్రను బాబు కూడా ప్లాన్ చేస్తున్నారనే సమాచారం ఉంది. అయితే ఇద్దరి మధ్య అగాధం పెరిగిన అనంతరం నాగం మొదటిసారి బాబు ఇంటికి వెళ్లడం ప్రాధాన్యత సంతరించుకుంది.