పుట్టపర్తిలో ఆస్ట్రేలియా భక్తురాలి మృతి: తరలి వస్తున్న భక్తులు

By Srinivas

Published: Monday, April 25, 2011, 13:03 [IST]

అనంతపురం: భగవాన్ శ్రీ సత్యసాయిబాబా పార్థివ శరీరాన్ని చూడటానికి వచ్చిన ఓ విదేశీ భక్తురాలు సోమవారం ప్రమాదంలో మృతి చెందింది. ఆస్ట్రేలియాకు చెందిన మేరీపాల్ భగవాన్ శ్రీ సత్యసాయిబాబాకు మంచి భక్తురాలు. అయితే ఆమె బాబా పార్థివ శరీరాన్ని చూడటానికి పుట్టపర్తికి చేరుకున్నారు. అయితే ప్రమాదవశాత్తూ పుట్టపర్తిలో ఓ బస్సు ఢీకొని మేరీపాల్ మృతి చెందింది. కాగా ఆదివారం బాబా శివైక్యం చెందారనే వార్త విన్న పలువురు భక్తులు కూడా కుప్పకూలిపోయిన విషయం తెలిసిందే.

తమ ఆరాధ్య దైవం లేరనే విషయం తెలిసి తూర్పుగోదావరి జిల్లా రావులపాలెం శెట్టిబలిజనగర్‌కు చెందిన గుత్తుల మంగమ్మ టీవీలో సాయి నిర్యాణం వార్తలు చూసి కుప్పకూలిపోయింది. ప్రకాశం జిల్లా ముండ్లమూరు మండలం పులిపాడుకు చెందిన లక్కిరెడ్డి వెంకటరెడ్డి గుండెపోటుతో చనిపోయారు. పుట్టపర్తిలోని జెండామాను వీధిలో ఉంటున్న నారాయణమ్మ, కృష్ణా జిల్లాలోని నరసాపురానికి చెందిన పసుపులేటి రాణి కూడా మరణించారు.

కాగా సోమవారం బాబాను చూడటానికి భక్తులు లక్షలాదిగా తరలి వస్తున్నారు. ఆర్టీసీ హైదరాబాద్, విజయవాడ తదితర ప్రాంతాల నుండి ప్రత్యేక బస్సులు వేయడంతో భక్తులు తరలి వస్తున్నారు. కర్ణాటక ప్రభుత్వం కూడా పుట్టపర్తికి ప్రత్యేక బస్సులు వేసింది. దక్షిణ మధ్య రైల్వే కూడా పుట్టపర్తికి రైళ్లను నడుపుతోంది.

Published On April 25, 2011