మహిళల విషయంలో చిరు తమ్ముల బాగోతం ఉంది!: కొండా సురేఖ

By Srinivas

Published: Sunday, May 1, 2011, 16:39 [IST]

కడప: మహిళల విషయంలో ప్రజారాజ్యం పార్టీ అధ్యక్షుడు చిరంజీవి తమ్ముళ్లు చేసిన ఆరోపణలు రికార్డులుగా ఉన్నాయని మాజీ పార్లమెంటు సభ్యుడు వైయస్ జగన్మోహన్ రెడ్డి వర్గం కాంగ్రెసు పార్టీ ఎమ్మెల్యే కొండా సురేఖ ఆదివారం అన్నారు. ఏఐసిసి అధ్యక్షురాలు సోనియాగాంధీని జగన్ ఏమీ అనలేదని అన్నారు. చంద్రబాబు కాంగ్రెసుతో కలిసినా ఆశ్యర్చ పోవాల్సిన అవసరం లేదన్నారు. చిరంజీవికి కాంగ్రెసుతో నాలుగు రోజులు ఉంటే కాంగ్రెసు తీరు తెలుస్తుందని అన్నారు. ఆయనకు ఇప్పుడే ఏమీ తెలియదన్నారు.

వైఎస్ఆర్ కాంగ్రెస్ పార్టీ అధ్యక్షుడు జగన్మోహన రెడ్డి పేరు చెబితేనే తెలుగుదేశం పార్టీ అధ్యక్షుడు చంద్రబాబు నాయుడుకు గుండెదడ వస్తుందని ఆమె అన్నారు. ఇక ముఖ్యమంత్రి అయ్యే అవకాశం లేదని తెలియడంతో ఆయన ఏం మాట్లాడుతున్నారో ఆయనకే అర్ధంకావడంలేదన్నారు. ఇవి కడపకు ఢిల్లీకి జరుగుతున్న ఎన్నికలని ఆమె అన్నారు. ఇక్కడ ఓటేస్తే ఢిల్లీలో గూబగుయ్యమనాలని ఆమె ఓటర్లకు పిలుపు ఇచ్చారు.

గత మూడు రోజులుగా వైఎస్సార్ జిల్లా ఎన్నికల ప్రచారంలో పాల్గొంటున్న టీడీపీ అధ్యక్షుడు చంద్రబాబు నాయుడు ప్రజలను రెచ్చగొట్టేలా ప్రసంగిస్తున్నారని వైఎస్సార్ కాంగ్రెస్ పార్టీ నేత , టీటీడీ మాజీ చైర్మన్ భూమన కరుణాకరరెడ్డి అన్నారు. చంద్రబాబు తన అనుచరులతో కలిసి కొమ్మునూతల గ్రామస్థులపై దాడికి పాల్పడ్డారని ఆరోపించారు. ప్రభుత్వానికి, చంద్రబాబుకు అనుకూలంగా పోలీసులు పనిచేస్తున్నారని కరుణాకరరెడ్డి అన్నారు.

Published On May 1, 2011