చంద్రబాబుతో ఫోన్లో మాట్లాడిన రాజశేఖర్: 3వ తారీఖు ముహూర్తం

By Srinivas

Published: Sunday, May 1, 2011, 16:46 [IST]

హైదరాబాద్: హీరో రాజశేఖర్, జీవిత దంపతులు తెలుగుదేశం పార్టీలో చేరడానికి రంగం సిద్ధమయినట్లుగా తెలుస్తోంది. రాజశేఖర్, జీవిత కడప జిల్లాలో ఉప ఎన్నికల ప్రచారంలో ఉన్న పార్టీ అధినేత చంద్రబాబునాయుడుతో ఫోన్లో మాట్లాడినట్లుగా తెలుస్తోంది. హైదరాబాదులో ఉన్న రాజశేఖర్, జీవితలు ఆదివారం మధ్యాహ్నం బాబుతో స్వయంగా మాట్లాడారు. వారు టిడిపిలో చేరడానికే చంద్రబాబుకు ఫోన్ చేసినట్లుగా తెలుస్తోంది. దీనికి చంద్రబాబు కూడా సానుకూలంగా స్పందించినట్లుగా తెలుస్తోంది. వారిని పార్టీలోకి సాదరంగా ఆయన ఆహ్వానించారని తెలుస్తోంది.

కాగా గత రెండు మూడు రోజులుగా రాజశేఖర్, జీవితలు వైయస్ఆర్ కాంగ్రెసు పార్టీ అధినేత వైయస్ జగన్‌పై విరుచుకు పడుతున్న విషయం తెలిసిందే. జగన్ అక్రమ ఆస్తులపై కూడా రాజశేఖర్ ప్రశ్నించారు. అంతేకాకుండా కాంగ్రెసు పార్టీ కూడా తమను నిర్లక్ష్యం చేసి చిరంజీవిని చేరదీసిందని ఆరోపించారు. దాంతో అప్పటికే రాజశేఖర్ టిడిపిలో చేరతారనే వాదనలు వినిపించాయి. ఈ నేపథ్యంలో ఆదివారం బాబుకు ఫోన్ చేయడం, వారిని బాబు సాదరంగా ఆహ్వానించడం పరిణామాలు చోటు చేసుకున్నట్టుగా తెలుస్తోంది.

Published On May 1, 2011