లాడెన్‌పై దాడిని బరాక్ ఒబామా, ఆయన కంపెనీ ఎలా చూశారు?

వాషింగ్టన్: అంతర్జాతీయ ఉగ్రవాది ఒసామా బిన్ లాడెన్‌పై జరిగిన దాడిని అమెరికా అధ్యక్షుడు బరాక్ ఒబామా, ఆయన జాతీయ భద్రతా బృందం ప్రతినిధులు ప్రత్యక్షంగా చూశారు. దాడిని ప్రత్యక్షంగా చూస్తూ శబ్దాలను కూడా విన్నారు. శ్వేతసౌధంలోని సిచ్యుయేషన్ గదిలో కూర్చుని ఊపిరి బిగబట్టి ఆపరేషన్‌ను తిలకించారు. తాము రచించిన ప్రణాళిక విజయవంతంగా అమలవుతుందా, లేదా అనే ఉత్కంఠ వారిలో నెలకొని ఉంది.

తాము ఏ విధమైన దృశ్యాలను చూశాం, ఏ విధమైన సమాచారం తమకు లభించిందనే విషయాలను బయటపెట్టలేమని శ్వేతసౌధం ఉగ్రవాద నిరోధక సలహాదారు జాన్ బ్రెన్నన్ చెప్పారు. గోల్ఫ్ ఆడుతున్న ఒబామా దాన్ని వదిలేసి సిచ్యుయేషన్ రూంలోకి వచ్చారు. ఆపరేషన్‌లో పాల్గొన్న నేవీ సీల్ టీమ్ హెల్మెట్ కమెరాలను ధరించారని, అవి దృశ్యాలనూ శబ్దాలను ప్రసారం చేశాయని, దాంతో ఆపరేషన్‌ను ప్రత్యక్షంగా చూడగలిగారని చెబుతున్నారు.

సీల్స్ అబ్బొత్తాబాద్‌లోని లాడెన్ నివసిస్తున్న భవనంపై దిగినప్పటి నుంచి ఆపరేషన్ పూర్తయ్యే వరకు తమలో ఊపిరి సలపనంతగా ఉత్కంఠ నెలకొని ఉందని, నిమిషాలు రోజుల్లాగా గడిచాయని బ్రెన్నన్ చెప్పారు. ఏమైనా జరగవచ్చు, లాడెన్ కనిపిస్తాడా, లేదా అనేది కూడా అనుమానమేనని ఆయన అన్నారు. ఓ హెలికాప్టర్ దెబ్బ తిన్నదని, వెంటనే ప్రత్యామ్నాయం ఆలోచించి, మరో హెలికాప్టర్‌ను రంగంలోకి దించామని, అది ఫలితం ఇచ్చిందని, లాడెన్ హతమయ్యాడని ఆయన అన్నారు.

English summary

From halfway around the world, President Barack Obama and his national security team monitored the strike on Osama bin Laden's compound in real time, watching and listening to the firefight that killed the terrorist leader.