ఇంజినీరు హత్య కేసులో బిఎస్పీ ఎమ్మెల్యే సహా పదిమందికి జీవిత ఖైదు

By Srinivas

Published: Friday, May 6, 2011, 14:56 [IST]

లక్నో: ఇంజినీరు మనోజ్‌ గుప్తా హత్య కేసులో బిఎస్పీ శాసనసభ్యుడు శేఖర్‌ తివారీ సహా పది మందికి న్యాయస్థానం జీవిత ఖైదు విధించింది. ఈ కేసులో మొత్తం 11 మందిని కోర్టు దోషులుగా గుర్తించింది. పార్టీ విరాళం పేరున డబ్బు ఇవ్వనందుకు మనోజ్‌ గుప్తా అనే ఇంజినీరు మూడేళ్ల క్రితం 2008, డిసెంబరు 24న దారుణ హత్యకు గురయ్యాడు. మనోజ్ గుప్తా భార్య ఫిర్యాదు మేరకు కేసు నమోదు చేసుకున్న పోలీసులు దర్యాప్తు చేశారు.

సాక్ష్యాలను తుడిపేసిన కారణంగా ఎమ్మెల్యే భార్య విభా తివారికి కూడా రెండున్నర సంవత్సరాల కారాగార శిక్షను జడ్జ్ వీరేంద్ర కుమార్ విధించారు. జీవిత కాల కారాగార శిక్ష పడ్డ ఒక్కొక్కరికి రూ.68 వేలు, విభాకు రూ.4500 జరిమానా కోర్టు విధించింది. జీవిత ఖైదు విధించబడ్డ వారు - వినయ్ తివారి, రాంబాబు, యోగేంద్ర డోహ్రె, మనోజ్ అవాస్తి, దేవేంద్ర రాజ్‌పుట్, సంతోష్ తివారి, గజ్రాజ్ సింగ్, పాల్ సింగ్, డిహెచ్ సింగ్ ఉన్నారు. 2008లో మాయావతి పుట్టినరోజు వేడుకలకోసం బిఎస్పీ ఎమ్మెల్యే శేఖర్‌ తివారీ, ఆయన అనుచరులు ఇంజినీరును డబ్బు ఇవ్వమని ఒత్తిడి చేసినట్టు ఆరోపణలు వచ్చాయి.

Published On May 6, 2011