కడపలో ఆగని చిచ్చు: కాంగ్రెసు కార్యకర్తలను చితకబాదిన జగన్ వర్గం

By Srinivas

Published: Tuesday, May 10, 2011, 11:50 [IST]

కడప: జిల్లాలో ఉప ఎన్నికలు ముగిసినా కాంగ్రెసు, మాజీ పార్లమెంటు సభ్యుడు వైయస్ జగన్మోహన్ రెడ్డికి చెందిన వైయస్ఆర్ కాంగ్రెసు పార్టీ మధ్యన చిచ్చు చల్లారినట్లుగా కనిపించడం లేదు. బి.కోడూరు మండలంలోని వెదుళ్లపల్లి, మాగన్నగారిపల్లె గ్రామంలో ఇరువర్గాల మధ్య తీవ్ర ఘర్షణలు చోటు చేసుకున్నాయి. కొందరు కాంగ్రెసు పార్టీ కార్యకర్తలు గ్రామంలోని పలువురు వోటర్లను ఓటు కోసం ఇచ్చిన డబ్బులు అడిగారని జగన్ వర్గం నేతలు చితకబాదినట్లుగా తెలుస్తోంది. దీంతో ఇరువర్గాలు బాహాబాహీకి దిగినట్లుగా తెలుస్తోంది.

పోలీసులు కలుగ జేసుకొని ఇరువర్గాలకు సర్ది చెప్పే ప్రయత్నాలు చేశారు. మరో గ్రామం మాగన్నగారిపల్లెలో కూడా కాంగ్రెసు పార్టీ కార్యకర్తలు వైయస్ఆర్ కాంగ్రెసు పార్టీ కార్యకర్తలకు చెందిన చినీ తోటలను ధ్వంసం చేసినట్లుగా తెలుస్తోంది. వైయస్ఆర్ కాంగ్రెసు పార్టీ కార్యకర్తలను ఆర్థికంగా దెబ్బతీసేందుకే వారు తోటలను ధ్వంసం చేసినట్లుగా తెలుస్తోంది. ఆ తోటలు జమ్మలమడుగు ఎమ్మెల్యే ఆదినారాయణరెడ్డి అనుచరుడికి సంబంధించిన తోటలు అని తెలుస్తోంది. దీంతో కాంగ్రెసు పార్టీ కార్యకర్తలు పోలీసు స్టేషన్‌కు వెళ్లి జగన్ వర్గం నేతలపై పోలీసులకు ఫిర్యాదు చేసినట్లుగా తెలుస్తోంది.

Published On May 10, 2011