చిరంజీవిపై ఆత్మహత్యల కేసు, అనుచిత వ్యాఖ్యలకు లగడపాటిపై ఫిర్యాదు!

By Srinivas

Published: Thursday, May 12, 2011, 17:17 [IST]

హైదరాబాద్: తెలంగాణ జిల్లాల్లో ఆత్మహత్యలకు ప్రజారాజ్యం అధ్యక్షుడు చిరంజీవి వ్యవహారమే కారణమంటూ కేసు నమోదు చేసి వెంటనే విచారణ జరిపించాలని జూబ్లీహిల్స్ పోలీసులను నాంపల్లి కోర్టు గురువారం ఆదేశించింది. ప్రత్యేక తెలంగాణ ఉద్యమం నేపథ్యంలో జరిగిన పలువురు విద్యార్థుల ఆత్మహత్యలకు చిరంజీవి కారణం అంటూ తెలంగాణకు చెందిన పలువురు న్యాయవాదులు కోర్టును ఆశ్రయించారు. తెలంగాణ ప్రజలను మోసం చేసి చిరంజీవి పరోక్షంగా ఆత్మహత్యలకు కారకుడయ్యాడని, ఆయనపై చర్యలు తీసుకోవాలని కోరుతూ వారు ఆరోపిస్తూ కోర్టును ఆశ్రయించారు. న్యాయవాదుల ఫిర్యాదును స్పందించిన నాంపల్లి కోర్టు పిటిషన్ స్వీకరించి చిరంజీవిపై ఆత్మహత్యల కేసు నమోదు చేయాలని జూబ్లీహిల్స్ పోలీసులను ఆదేశించింది. వెంటనే విచారణ జరిపించాలని వారు ఆదేశాలు జారీ చేశారు. సామాజిక తెలంగాణకు కట్టుబడి ఉన్నామని మొదట చెప్పిన చిరంజీవి ఆ తర్వాత మాట మార్చి తెలంగాణ రాష్ట్ర ఏర్పాటును వ్యతిరేకించారని ఫిర్యాదు చేశారు.

కాగా తెలంగాణ న్యాయవాదులు గురువారం ఉదయం విజయవాడ పార్లమెంటు సభ్యుడు లగడపాటి రాజగోపాల్‌పై కూడా మానవ హక్కుల కమిషన్‌లో ఫిర్యాదు చేశారు. ఇటీవల మే 9న విశాఖపట్నంలో జరిగిన ఓ సమావేశంలో లగడపాటి తెలంగాణ ప్రజల మనోభావాలు దెబ్బతినేలా మాట్లాడారని ఆయనపై చర్యలు తీసుకోవాలని న్యాయవాదులు హెచ్చార్సీ తాత్కాలిక కమిషనర్ కాకమాను పెదపేరిరెడ్డిని కోరారు. దీనికి స్పందించిన కాకమాను సెప్టెంబర్ 22లోగా సమగ్ర నివేదిక ఇవ్వాలని డిజిపిని ఆదేశించింది.

Published On May 12, 2011