గిట్టుబాటుపై అధికార కాంగ్రెసు మొద్దు నిద్ర: టిడిపి నేత ఎర్రన్నాయుడు

By Srinivas

Published: Thursday, May 12, 2011, 13:49 [IST]

హైదరాబాద్: రాష్ట్ర రైతాంగ సమస్యలపై కాంగ్రెసు ప్రభుత్వం మొద్దు నిద్ర వహిస్తుందని తెలుగుదేశం పార్టీ సీనియర్ నాయకుడు ఎర్రన్నాయుడు గురువారం ఎన్టీఆర్ ట్రస్ట్ భవన్‌లో ఏర్పాటు చేసిన సమావేశంలో అన్నారు. రైతుల సమస్యలను ఏమాత్రం పట్టించుకోవడం లేదని ఆరోపించారు. కేంద్రంలో రాష్ట్రం నుండి మంత్రులు, ఎంపీలు చాలామంది ఉన్నప్పటికీ వారు లేఖలకే పరిమితం అయ్యారని ఆరోపించారు. మద్దతు ధరలపై ప్రభుత్వం చర్యలు తీసుకోక పోవడం శోచనీయం అన్నారు. ప్రతిపక్ష నేత చంద్రబాబునాయుడు లేఖ రాసిన తర్వాతే జిల్లాలకు అధికారులను నియమించారని గుర్తు చేశారు. రైతాంగ సమస్యలపై ఈ నెల 19న రాష్ట్రవ్యాప్తంగా రహదారుల దిగ్బంధం ఉంటుందని చెప్పారు.

గిట్టుబాటు ధర లేక రైతులు ధాన్యాన్ని రోడ్లపై పోసి తగలబెడుతున్నారని ఆవేదన వ్యక్తం చేశారు. ఆరు నెలలు గడిచినా ఇప్పటి వరకు ఇన్ పుట్ సబ్సిడి విడుదల కాలేదన్నారు. ప్రభుత్వం స్వామినాథన్ కమిషన్ నివేదికను ఎందుకు అమలు చేయడం లేదని ప్రశ్నించారు. స్వామినాథన్ నివేకదిక అమలు చేయకుండా ఇంకా ఎన్నాళ్లు రైతులను మోసం చేస్తారని ప్రశ్నించారు. రైతులకు కేంద్రం ప్రతిపాదించిన పరిహారం ఇవ్వాలని డిమాండ్ చేశారు. రాష్ట్రంలో అక్రమ మైనింగ్ అడ్డుకోవడానికి ముఖ్యమంత్రి కిరణ్ కుమార్ రెడ్డి చర్యలు తీసుకోవాలని కోరారు. రైతులను పరామర్శించడానికి గురువారం నుండు మూడు రోజుల పాటు చంద్రబాబు జిల్లాల్లో పర్యటిస్తారని చెప్పారు.

Published On May 12, 2011