నందమూరి ఫ్యామిలీకి తెలుగుదేశం అధినేత చంద్రబాబు చురక

By Pratap

Published: Saturday, May 14, 2011, 15:03 [IST]

విజయవాడ: పార్టీ వారసత్వం కోసం పోరాడుతున్న నందమూరి ఫ్యామిలీకి తెలుగుదేశం పార్టీ అధ్యక్షుడు నారా చంద్రబాబు నాయుడు పరోక్షంగా చురక పెట్టారు. దేశంలో వారసత్వ రాజకీయాలు పనికి రావని ఆయన అన్నారు. గుంటూరుకు బయలుదేరి వెళ్లే ముందు ఆయన విజయవాడలో శనివారం మీడియా ప్రతినిధుల సమావేశంలో మాట్లాడారు. పార్టీలో నందమూరి, నారా కుటుంబాల మధ్య వారసత్వ పోరు జరుగుతోందనే వార్తలను ఆయన ఖండించారు. అదంతా మీడియా సృష్టేనని ఆయన కొట్టిపారేశారు.

రాజీవ్ గాంధీ చనిపోయినప్పుడు సోనియా గాంధీ ప్రధాని కాలేదని, పివి నరసింహారావు ప్రధాన మంత్రి అయ్యారని ఆయన అన్నారు. ఎంజి రామచంద్రన్ మరణించగానే జయలలిత అధికారం చేపట్టలేదని, ఒరిస్సా ముఖ్యమంత్రి నవీన్ పట్నాయక్ విషయంలోనూ అలాగే జరిగిందని ఆయన ఉదహరించారు. నందమూరి హరికృష్ణ, జూనియర్ ఎన్టీఆర్ తెలుగుదేశం పార్టీ పగ్గాలను చేజిక్కించుకోవడానికి ప్రయత్నిస్తున్నారనే వార్తల నేపథ్యంలో ఆయన ఆ వివరణ ఇచ్చారు.

రాజకీయాల్లో వంశపారంపర్యత పనికి రాదని ఆయన అన్నారు. నాయకుడిని ప్రజలే నిర్ణయించుకోవాలని ఆయన అభిప్రాయపడ్డారు. తమ పార్టీలో ప్రతి నాయకుడికీ నచ్చజెప్పే ప్రయత్నం చేస్తున్నానని ఆయన చెప్పారు. పార్టీకి నష్టం కలిగించే పనులను దిగితే ఉపేక్షించేది లేదని ఆయన హెచ్చరించారు. రాష్ట్ర ప్రభుత్వం రైతులను పట్టించుకోవడం లేదని ఆయన విమర్శించారు.

Published On May 14, 2011